Die hekhuisie en deurgang tussen die paleis en die abdy.
Dunfermline-paleis (Engels: Dunfermline Palace) is ’n voormalige Skotse koninklike paleis in Dunfermline, Fife. Die ruïne is vandag ’n gewilde toeriste-attraksie.
Die dorp Dunfermline was die gunsteling-blyplek van verskeie Skotse monarge. Reeds in die 11de eeu het koning Malcolm III dit sy hoofstad gemaak. Sy eerste blyplek was Malcolm's Tower, ’n paar honderd meter wes van die latere paleis. In die Middeleeue is Dawid II en Jakobus I van Skotland in die paleis gebore.
Dunfermline is langs die historiese Dunfermline-abdy geleë en is daarmee verbind deur ’n hekhuis met ’n deurgang. Dit was aanvanklik die terrein van die abdy se gastehuis. In 1589 het Jakobus VI dit ná sy troue aan sy vrou, Anna van Denemarke, gegee. Drie van hul kinders is daar gebore.
Ná die vereniging van die Engelse en die Skotse kroon in 1603 het die Skotse hof na Londen geskuif en is die gebou selde deur ’n monarg besoek. Die laaste monarg wat daar gebly het, was Karel II in 1650 net voor die Slag van Inverkeithing. Kort daarna, tydens Oliver Cromwell se besetting van Skotland, is die gebou ontruim en teen 1708 was die dak weg.
Al wat nog oor is, is die kombuis, kelders en die indrukwekkende suidelike muur.
