Nelson Mandelabaai Metropolitaanse Munisipaliteit

Nelson Mandelabaai

Provinsie

Oos-Kaap

Tipe

Metropolitaanse Munisipaliteit

Munisipale kode

NMA

Plaaslike munisipaliteite

Geen

Hoofstad

Gqeberha (voorheen Port Elizabeth)

Burgemeester

Retief Odendaal (DA)

Grootste tale

Xhosa, Afrikaans, Engels

Oppervlakte

1 959 km²

Bevolking

1 152 115 (2011)


Geografiese verspreiding van huistale in die Nelson Mandelabaai Metropolitaanse Munisipaliteit: Afrikaans Engels Xhosa Geen meerderheidstaal		Geografiese verspreiding van etniese groepe in die Nelson Mandelabaai Metropolitaanse Munisipaliteit: Swart mense Bruin mense Asiatiese Suid-Afrikaners Wit Suid-Afrikaners Geen dominante nie Geen bevolking nie

Die Nelson Mandelabaai Metropolitaanse Munisipaliteit is een van die agt metropolitaanse munisipaliteite in Suid-Afrika.

Die naam is gekies om die eertydse president Nelson Mandela te vereer, ten spyte van die feit dat daar nie 'n geografiese kenmerk in die gebied met hierdie naam is nie.

Hoofgebiede

Die sensus van 2001 verdeel die munisipaliteit in die volgende gebiede:^[1]

Plek	Kode	Area (km²)	Bevolking	Dominante taal
Beachview	27501	0.78	500	Afrikaans
Bethelsdorp	27502	77.64	134,617	Afrikaans
Blue Horizon Bay	27503	2.74	409	Afrikaans
Cannonvale	27504	0.69	196	Afrikaans
Colchester	27505	1.28	743	Afrikaans
Despatch	27506	38.75	25,086	Afrikaans
Gqeberha	27507	1.90	16,686	Xhosa
Ibhayi	27508	23.69	255,826	Xhosa
Kabah	27509	1.68	3,282	Afrikaans
Khaya Mnandi	27510	0.82	5,379	Xhosa
Kwa Langa	27511	0.70	8,196	Xhosa
Kwadwesi	27512	5.10	17,733	Xhosa
KwaNobuhle	27513	15.34	87,585	Xhosa
Motherwell	27514	29.52	117,319	Xhosa
Port Elizabeth	27516	335.30	237,500	Afrikaans
Seaview	27517	1.60	732	Engels
Uitenhage	27518	84.77	71,666	Afrikaans
Woodridge	27519	0.56	270	Xhosa
Young Park	27520	0.52	762	Afrikaans
Res van die munisipaliteit	27515	1,328.77	21,281	Xhosa

Munisipale verkiesings

Ná die munisipale verkiesing van 2011 het die ANC 63 uit die 120 setels in die raad beheer. Die Demokratiese Alliansie was die amptelike opposisie met 48, terwyl COPE ses en die ACDP, PAC en UDM een setel elk het. In dié verkiesing het die ANC 377 138 stemme op hom verenig, vergeleke met die DA se 291 571, uit 'n totaal van 723 740. Die ANC het 34 wyke gewen en die DA 26, die enigste twee partye wat wyke kon wen.

Ná munisipale verkiesing op 3 Augustus 2016 het die Demokratiese Alliansie as die grootste party uit die stryd getree, hoewel hy met 355 471 van die 753 895 uitgebragte stemme nie 'n volstrekte meerderheid kon behaal nie. Die ANC het 311 416 stemme gekry, terwyl die EFF die derde grootste party met 38 951 stemme was. Dié uitslag het aan die DA 57 setels besorg, aan die ANC 50 en aan die EFF vyf in 'n raad met 120 setels. Drie tradisionele alliansievennote van die DA – die UDM (2), ACDP (1) en COPE (1) – kon saam sorg vir 'n totaal van 61 setels, vergeleke met die ander partye se 59. Hierdie keer kon die ANC 36 wyke wen, die DA 23 en die EFF een, nadat die ANC-kandidaat onttrek het. Athol Trollip is op 18 Augustus 2016 onbestrede as burgemeester gekies nadat die ANC nie aan die stemmery wou deelneem nie en die DA 'n ooreenkoms met die UDM en ACDP aangegaan het. Mongameli Bobani (UDM) is as onderburgemeester gekies en Jonathan Lawack (DA) as speaker. Trollip en Lawack is op 27 Augustus 2018 uit hul poste verwyder en met onderskeidelik Bobani en Buyelwa Mafaya (ANC) vervang.^[2] Bobani is op 5 Desember 2019 self uit die amp verwyder, nadat hy vroeër vyf mosies van wantroue oorstaan het.^[3] Op 4 Desember 2020 is Nqaba Bhanga van die Demokratiese Alliansie as nuwe burgemeester verkies.^[4]

Ná die munisipale verkiesing van 2021 het die ANC en die Demokratiese Alliansie beide 48 setels beheer, en Eugene Johnson van die ANC is op 22 November 2021 as burgemeester ingehuldig.

Tydens 'n raadsvergadering op 21 September 2022, is me. Johnson uitgestem as burgemeester en opgevolg deur die DA se Retief Odendaal.^[5]