Die munisipaliteit het in 1969 ontstaan, toe Johannesburg in 'n noordelike rigting uitgebrei het. Sandton was aanvanklik 'n oorwegend residensiële voorstad, wat hoofsaaklik uit klein eiendomme bestaan het.
1990's
Ná die einde van apartheid en die vestiging van die nuwe politieke bedeling het Sandton 'n deel van die Johannesburg Metromunisipaliteit geword en beskik dus sedertdien nie meer oor sy eie munisipale bestuur nie.
Finansiële en sakesentrum
Sandton het ná die agteruitgang van Johannesburg se oorspronklike sakekern, wat een van die brandpunte van misdaad geword het, tot Suid-Afrika se nuwe finansiële sentrum en Johannesburg se belangrikste sakegebied ontwikkel. Nogtans het net een van Suid-Afrika se vier grootste banke, Nedbank, sy hoofkwartier na Sandton verskuif. Desondanks het die voorstad baie van Suid-Afrika se "nuwe geld" gelok, en naas beleggingsbanke en finansiële konsultante het ook Johannesburg se effektebeurs in die laat 1990's sy kantore na Sandton verskuif.
Sandton huisves die kongressentrum Sandton Convention Centre, een van die grootstes op die vasteland van Afrika, waar onder meer die Wêreldspitsberaad oor Volhoubare Ontwikkeling in Augustus2002 plaasgevind het.
Toerisme en kleinhandel
Sandton City, een van die grootste winkelsentrums in Afrika, is een van die besienswaardighede in die voorstad. Saam met Nelson Mandelaplein beskik die sentrum oor 144 000 vierkante meter totale winkeloppervlakte, wat dit die grootste van sy soort in die suidelike halfrond maak. Sandton is ook die belangrikste bestemming vir sakereisigers in die metropolitaanse gebied van Johannesburg en bied 'n reeks vyfsterhotelle.
