Melilla isch sit 1497 in spanischem Bsitz; au noch dr Unabhängigkeit vo Marokko 1956 si Melilla und Ceuta, wo ebefalls in Nordafrika lit, spanisch bliibe. Vo marokkanischer Site wird dr Gebietsaaspruch uf die beide Stedte grundsätzlig bedont; Marokko het aber nie konkreti Schritt undernoh, se duurezsetze. Sit 1995 hai Ceuta und au Melilla dr Status von ere „autonome Stadt“ (ciudad autónoma), won ene e baar Befuegniss vo de autonome Gmeinschafte git. Melilla isch en integrale Bestanddeil vom spanische Staatsgebiet und vo dr Europäischen Union, het aber e baar Sonderrächt. Im Bsundere ghört s noch Art. 3 Abs. 1 Zollkodex nid zum Zollgebiet vo dr Europäischen Union.
As Exklave (im wiitere Sinn) vo dr Europäischen Union uf em afrikanische Kontinänt isch Melilla e begehrts Ziil für illegali Iiwanderer, wo die meiste von ene hoffe, vo dòrt uf Europa chönne goh. In de letzte Johr hai die spanische und die marokkanische Behörde d Befestigung und d Überwachig vo dr Gränze massiv versterkt.
Lag
D Stadt lit uf ere Halbinsle vom afrikanische Kontinänt und zringsum het s Wallanlage.
