O Congreso d'os Deputaus (Congreso de los Diputados en castellano y oficialment) ye a cambra baxa d'as Corz Chenerals, l'organo constitucional que representa a o pueblo espanyol. A Constitución Espanyola de 1978 estableixió una organización bicameral d'as Corz Chenerals (Congreso y Senau), as cuals eixerzen a potestat lechislativa de l'Estau, apreban os presupuestos, controlan l'acción d'o Gubierno y tienen atras competencias que l'atorga a Constitución.
Seguntes a Lei Organica 5/1985, de 19 de chunio, d'o Rechimen Electoral Cheneral, ye compuesto d'un minimo de 300 y un maximo de 400 deputaus, eslechitos por sufrachio universal, libre, directo y secreto, en os termins que estableixe a lei[2]. As eleccions se celebran ordinariament cada cuatro anyos, o antis en caso d'esleicions dimpués d'una disolución anticipada d'as Cambras. Os miembros d'o Congreso d'os Deputaus s'eslichen meyant representación proporcional con listas zarradas en cada circunscripción electoral d'alcuerdo con o sistema D'Hondt.
Os deputaus d'o Congreso se trestallan en Grupos Parlamentarios, que en a practica se corresponden con os diferents partius politicos fueras d'o Grupo Mixto, que chunta a os partius que no cumplen os requisitos ta constituir Grupo Parlamentario propio. Actualment o grupo con mas deputaus ye o Partido Socialista Obrero Español con 120 y amás bi ha treze partius politicos con representación parlamentaria.
O Congreso s'achunta en o Palacio d'as Corz, trobau en a plaza d'as Corz de Madrit. A lo largo de l'anyo, o Congreso s'achunta ordinariament de setiembre a aviento y de febrero a chunio, encara que pueden estar sesions extraordinarias a lo largo de tot l'anyo.
L'actual lechislatura d'o Congreso ye a XV lechislatura y a suya presidenta ye Francina Armengol Socías dende o 17 d'agosto de 2023.[1]
Referencias
Veyer tamién
Vinclos externos
