Se conoix con o nombre d' incident de Mainila (Mainilan laukaukset en finlandés) a unos feitos escaicitos o 26 de noviembre de 1939 en a muga entre Finlandia y a Unión Sovietica, cuan l'Exercito Royo sovietico afirmó que o lugar de Mainila (en Beloostrov, en l'istmo de Carelia entre o lago Ladoga y o golfo de Finlandia y amán d'a ciudat sovietica de Sant Petersburgo) heba recibito disparos d'artillería procedents de territorio finlandés que heban provocato baixas no nomás entre os militars sovieticos so que tamién entre a población civil.
Finlandia negó cualsiquier partecipación en istos feitos (Carl Gustaf Emil Mannerheim heba ordenato a l'Exercito finlandés de replegar a suya artillería desplegata en a muga ta evitar ista traza d'incidents), que en realidat fuoron obra d'o mesmo Exercito Royo, pero istas declaracions, como calía asperar, no fuoron acceptatas por os sovieticos. A Unión Sovietica denunció o Pacto de no agresión que heba sinyato con Finlandia (o Pacto de No Agresión Sovietico-Finés de 1932) y, emplegando istos feitos como casus belli, atacó Finlandia o 30 de noviembre de 1939, prencipiando asinas a dita Guerra d'Hibierno entre istos dos países.
