José Pardo Asso (Santa Cilia, Chacetania, 17 d'agosto de 1880[1] - Samianigo, 28 d'agosto de 1957[2]) fue un rector, mayestro y lexicografo aragonés, autor entre atras obras d'o Nuevo diccionario etimológico aragonés[3] de 1938 que lieva o suyo nombre.
Biografía
José Pardo Asso naixó en una casa de labrador en Santa Cilia, en o Campo de Chaca (actual comarca d'a Chacetania). Estudió en o Seminario Diocesano de Chaca y fue investiu sacerdot, recibindo de primer destino a parroquia de Yesero.[2] Dimpués pasaría por rechir diferents parroquias, siempre en o seno d'a Diocesi chaquesa y a de Uesca, como Chasa, Santa Cruz d'as Serors, Santolaria de Galligo y Larrés. Finalment, exerciría o sacerdocio por os mas anyos en Samianigo.[2]
En 1931, con l'advenimiento d'a II Republica espanyola, mosén Pardo pierde a suya asignación como rector de parroquia y se'n baixa ta Zaragoza, aon que estableixe una academia y residencia d'estudiants pa preparar a os chóvens pa que pasasen o Bachillerato y l'acceso a la Universidat.[2]
Amo d'una personalidat amable, estudioso y de vivo inchenio, refusó de plano a creixent intolerancia d'os suyos tiempos; mosén Pardo pasaba por alto d'as ideolochías, y mesmo fizo amistanza con uns que con atros. Fue amigo personal de l'anarquista Mariano Ascaso, de o profesor Ramón Menéndez Pidal, de o chesuita y arabista Miguel Asín Palacios y de Miguel Allué Salvador, president d'a Diputación Provincial de Zaragoza por ixas envueltas,[2] gracias a qui se publicaría buena cosa d'a suya obra.
En 1942, pasada la Guerra Civil, fue deteniu y encarcelau por as autoridaz franquistas por haber amagau a o chermano d'un amigo a qui a policía buscaba. Pasó dos meses en o campo de concentración de Sant Chuan de Mozarrifar.[2]
Morió en Samianigo o 28 d'agosto de 1957, con 77 anyos, victima d'un cáncer de pulmón.[2]
Obras
Referencias
Se veiga tamién
