The Hurt Locker (títol orichinal en anglés, en aragonés L'armario feriu, enguerada en Aragón con o títol en castellano d'En tierra hostil) ye una cinta de cine belico de cine estausunidense de l'anyo 2008 dirichida por Kathryn Bigelow seguntes un guión orichinal de Mark Boal, con una banda sonora orichinal de Marco Beltrami y Buck Sanders, una dirección de fotografía de Barry Ackroyd y una producción cinematografica de Kathryn Bigelow, Mark Boal, Nicolas Chartier y Greg Shapiro ta las productoras Voltage Pictures, Grosvenor Park Media, Film Capital Europe Funds, First Light Productions y Kingsgate Films, y con un elenco forma por, entre d'atros, os actors Jeremy Renner, Anthony Mackie, Brian Geraghty, Guy Pearce, Christian Camargo, David Morse, Ralph Fiennes, Evangeline Lilly, Christopher Sayegh, Malcolm Barrett, Sam Spruell y Suhail Dabbach.
The Hurt Locker se centra en as visicituz d'un equipo de desactivación d'explosivos de l'exercito estausunidense mientres a Guerra d'Iraq, mas que mas en a figura d'o sarchento William James y en bels incidents relacionaus con o suyo treballo como desactivador y en as suyas relacions con a resta de l'equipo. L'autor d'o guión, Mark Boal, fació un buen uso d'as conoixencias que heba adquiriu mientres o suyo treballo como periodista de guerra ta elaborar o guión. A cinta s'ambienta asinas en a guerra d'Iraq en 2004, habendo-se filmau las suyas escenas en Ammán (Chordania) y en Langley (Columbia Britanica, Canadá).[2]
Se tracta d'una cinta con muitos premios y nominacions, podendo-se destacar seis Premios Oscar (incluyius Millor Cinta, Millor Director y Millor Guión Orichinal) amás de tres nominacions (incluyiu Millor Actor) en a suya 82ena edición; seis Premios BAFTA (incluyius Millor Cinta, Millor Director y Millor Guión Orichinal) en a suya 63ena edición, amás d'una nominación a lo Premio BAFTA a lo Millor Actor; y tres nominacions a los Premios Globos d'Oro (Millor Director, Millor Cinta Dramatica y Millor Guión) en a suya 67ena edición).
Se veiga tamién
Referencias
Vinclos externos
