Charlotte Henry (3 de marzu de 1914, Brooklyn – 11 d'abril de 1980, La Jolla) foi una actriz d'Estaos Xuníos conocida polos sos papeles n'Alice in Wonderland (1933) y Babes in Toyland (1934). Tamién participó nel serial protagonizáu por Frank Buck Jungle Menace.[3]
Primeros años
Nacida en Brooklyn, na ciudá de Nueva York, a bien temprana edá yá yera modelu y sentíase estelada pol teatru. Con solu 14 años d'edá sorprendió a la so familia al ser escoyida pa interpretar un importante papel en Courage, obra representada nel circuitu de Broadway, ya importante ésitu nel añu 1928.
Hollywood
Al añu siguiente, la so madre llevó a Charlotte a Hollywood. Ellí repitió'l so papel na versión cinematográfica de Courage (1930), y empezó a estudiar en Lawlors, una escuela pa neños profesionales, na que coincidió con Frankie Darro, Anita Louise y Betty Grable, ente otros. Junior Durkin, que trabayara con ella en Courage, suxirió a Charlotte como actriz d'una pieza na qu'él actuaba en Pasadena. Aquel día ella yá participara n'otros dos llargumetraxes: Huckleberry Finn en 1931 y Lena Rivers en 1932.
Nesa dómina Paramount taba buscando una moza pa participar na so nueva versión d'Alice in Wonderland, faciendo pruebes a más de 6.800 candidates. Un cazatalentos de Paramount vio a Henry actuar nel teatru, y entamó una prueba con ella. Una selmana más tarde Charlotte Henry yá trabayaba na película. La cinta xeneró una unánime aprobación del trabayu de Henry, anque nun tuvo una bona recaldación. L'efectu d'Alice na vida de Henry foi daqué más que l'avezada historia d'una actriz arruinada por una asociación negativa. Viose encaxellada y, a la vista de les demás persones, convirtiérase nel so personaxe, Alice, según afirmaba l'actriz nuna entrevista[ensin referencies].
Paramount emprestó a l'actriz a MGM pa rodar Babes in Toyland con Stan Laurel y Oliver Hardy. A pesar de que'l filme foi un ésitu, y de que quiciabes el so papel foi'l más recordáu de la so carrera, Charlotte nun siguió con MGM. Con tou, siguió nel cine, anque'l baxu presupuestu de les cintes nes qu'actuaba amenorgó la so popularidá. En total rodó unes 30 películes, dalgunes d'elles como protagonista, anque na mayor parte fixo papeles de repartu. La mayor parte de les sos películes rodáronse ente 1930 y 1937. Tres ello trabayó un tiempu como modelu y, ente 1941 y 1942, participó n'otres cinco producciones.
Últimos años
Amurniada pola baxa calidá de les ufiertes de trabayu que recibía, Henry retiróse del cine y treslladóse de Hollywood a San Diego, au dirixó una axencia d'emplegu en compañía de so madre. Darréu, y mientres 15 años, foi secretaria executiva del Obispu de San Diego, Charles F. Buddy.
Henry tuvo casada col Dr. James J. Dempsey, y siguió cola so carrera interpretativa actuando en delles producciones teatrales nel Teatru San Diego Old Globe.
Charlotte Henry finó en 1980 en La Jolla, California, pola mor de un cáncer. Foi soterrada nel Campusantu Holy Cross, en San Diego. Sobreviviéron-y el so home y el so hermanu, el Reverendu Robert E. Henry, de la Ilesia Episcopal St. Paul en Ventura (California).
Ver tamién
Referencies
Enllaces esternos
