Constantino IV (en llatín: Flavius Constantinus Augustus; griegu: Κωνσταντίνος Δ' [Kōnstanpito IV]; 649-685) foi un emperador bizantín que reinó ente 668 y 685. Llogró estabilizar les fronteres del Imperiu bizantín y recuperar parte del prestíu perdíu a lo llargo del sieglu VII.
Primeros años
Constantino yera'l fíu mayor del emperador Constante II. Foi nomáu coemperador al pie del so padre en 654,[1] cuando entá yera un neñu y convirtióse n'emperador dempués de que Constante II fuera asesináu en 668 en Siracusa.[2] Los sos hermanos menores Heraclio y Tiberio tuvieron acomuñaos con él al tronu imperial. Devolvió la capitalidad del Imperiu a Constantinopla, que la perdiera mientres el reináu del so padre.
El primer retu al que se tuvo qu'enfrentar Constantino IV foi'l rearmamientu del poder árabe. Los árabes habíen estáu sumíos nos últimos años nuna guerra civil del que resultó finalmente triunfante'l califa omeya Muawiya I. Los árabes acabaren la so guerra civil y el nuevu Califatu Omeya decidió atacar a los bizantinos pa gana-yos definitivamente.
Sitiu de Constantinopla (674-678)
En 674 la flota árabe atacó Constantinopla per mar sometiendo la ciudá a un asediu que duraría 4 años. Mentanto, los eslavos atacaron Tesalónica.[2] En 678 los bizantinos llograron finalmente refugar l'asediu árabe n'emplegando'l fueu griego[3] contra la flota árabe na batalla de Syllaeum. Foi una de les primeres vegaes que s'utilizó esta arma en combate. Los árabes fueron refugaos al ser simultáneamente vencíos n'Anatolia. La derrota árabe aumentó'l prestíu de los bizantinos, que roblaron la paz col Califatu Omeya en cuenta de un tributu añal que'l califa tenía de pagar al emperador.[4]
Últimos años
En 680 Constantino convocó'l VI Conceyu Ecuménicu (conocíu tamién como Tercer Conceyu de Constantinopla),[2] que reafitó la doctrina alcordada nel Conceyu de Calcedonia (451).[5] La mayor parte de los monofisitas, que constituyíen la mayoría relixosa en Siria y Exiptu, quedaren fora de les fronteres del Imperiu,[2] polo que nun tenía sentíu buscar un compromisu ente esta herexía y la ortodoxa cristiana[6] no referente a la naturaleza de Cristu. Les doctrines del monotelismu y el monoenergismu que fueren creaes como soluciones de compromisu y que los anteriores emperadores impulsaren como una forma d'atopar la paz relixosa dientro del Imperiu, fueron condergaes pol Conceyu. Esto dexó reconciliar al emperador col Papa y el cristianismu occidental que s'opunxera firmemente a cualquier esviación de la ortodoxa alcordada nel Conceyu de Calcedonia.
Constantino IV nuna moneda de la dómina
A pesar de los ésitos de Constantino IV al llograr la paz colos árabes y la reconciliación con Occidente; nun tuvo tanta suerte al defender les fronteres danubianas del Imperiu. Los búlgaros yeren un pueblu nómada procedente de les estepes ruses que llegaron al Danubiu escontra'l 670. Mientres los años nos que Constantinopla taba sometida al asediu árabe, los búlgaros se infiltraron al sur del Danubiu y asitiáronse nel territoriu de la moderna Bulgaria, onde sometieron a les tribus eslaves que vivíen na rexón.[2] Esi territoriu pertenecía formalmente al Imperiu bizantín, anque los desastres acaecíos a lo llargo del sieglu, había dexáu estensos territorios de los Balcanes fuera del control imperial. Una vegada llograda la paz colos árabes Constantino volvió la so mirada escontra'l norte y unvió una espedición en 680 destinada a desallugar a los búlgaros del territoriu al sur del Danubiu. La espedición sufrió una derrota desastrosa y eso forzó a Constantino a reconocer la esistencia del Primer Imperiu búlgaru en 681.
Los hermanos de Constantino IV; Heraclio y Tiberio fueren coronaos xunto a él como augustos,[7] a demandes de la población,[8] pero en 683 Constantino cortó-yos la llingua de tala forma que quedaron inhabilitaos como posibles candidatos al tronu.[2] Ello aseguró la socesión na figura de Xustinianu II, fíu de Constantino,[9] que foi coronáu emperador en 685 cuando'l so padre morrió de disentería.
