Una cuyar de madera ye un troféu irónicu que dase al deportista o al equipu que remató postreru nun campeonatu, y n'ocasiones a los novatos de la competición. El términu ye d'orixe inglés (inglés: Wooden spoon), en concretu una espresión estudiantil de la Universidá de Cambridge, y estendióse el so usu a los países de la Commonwealth, arriendes de popularizase a nivel internacional por cuenta de torneos como'l Seis Naciones de rugby.
La cuyar de madera en Cambridge
La cuyar de madera introdúxose per primer vegada na Universidá de Cambridge como un premiu irónicu dau polos estudiantes a aquel que consiguiera un grau de tercer clase (inglés: third-class degree, unu de los niveles más baxos de consecución d'un títulu universitariu en Reinu Xuníu, tamién denomináu junior optime) nel Mathematical Tripos, el cursu de matemátiques de Cambridge, coles calificaciones más baxes nos exámenes.[1][2] El términu "cuyar de madera", o inclusive a cencielles "la cuyar", aplicábase tamién por estensión al gallardoniáu,[3] y el premiu finalmente fíxose bien conocíu:
And while he lives, he wields the boasted prize
Whose value all can feel, the weak, the wise;
Displays in triumph his distinguish'd boon,
Les cuyares, que realmente yeren de madera, foron creciendo de tamañu hasta llegar a midir más d'un metro y mediu. Por tradición, la cuyar colgábase burllonamente del balcón de la Senate House de la universidá frente al gallardoniáu nel momentu qu'esti empobinaba escontra'l vicerrector a recibir el so títulu. Esta costume estudiantil tuvo llugar siquier hasta 1875, cuando se prohibió esplícitamente pola universidá.[5][6]
Los estudiantes que llograren un títulu de segunda (senior optime) o de primer clase (wrangler) coles peores calificaciones, respeutivamente, dacuando yeren conocíos como cuyar de plata y cuyar d'oru.[3] Per otra parte, l'alumnu cola calificación más alta pasaba a ser llamáu senior wrangler. Los estudiantes que desafortunadamente quedaren per debaxo de la calificación de la cuyar de madera, y por tanto consiguíen un grau ordinariu, recibíen diversos nomes según la so posición na llista.[4]:284[7]
Esta costume académica remóntase siquier a finales del sieglu XVIII, siendo documentada en 1803,[6] y depués siguida hasta 1909 (a pesar de la prohibición final).[8] A partir de 1910, los resultaos nos exámenes diéronse n'orde alfabéticu y non según la nota, polo que resultaba bien complicáu concluyir quién quedara na última posición.[6]
La última cuyar de madera
El postreru "Cuyar de madera".
La cabera cuyar de madera foi dada a Cuthbert Lempriere Holthouse, un remeru del Lady Margaret Boat Club del Saint John's College, nel añu 1909 mientres la ceremonia de graduación na Senate House. El mangu tien forma de remu y tien un epigrama en griegu que reza, aproximao, "esta ye la postrera de toles cuyares de madera, tu que la ves, arrama una llárima". Esta cabera cuyar atópase na actualidá nel Saint John's College, y caltiénse otra na biblioteca del Selwyn College. Con motivu del centenariu de la última cuyar de madera, dende'l 8 de xunu de 2009 hasta'l 26 de xunu de 2009, Saint John's College acoyó una exhibición de les cinco cuyares de madera que siguen calteniendo nos colexos: la del Saint John's (1909), la del Selwyn (1906),[5] la del Emmanuel (1889) y les del Corpus Christi (1895 y 1907).[9] Hai otres cinco cuyares de madera en manes privaes.[6]
Rugby
La cuyar de madera (Wooden spoon n'inglés), referida al Tornéu de les Seis Naciones de rugbi, ye'l términu col que se conoz al troféu dau al equipu qu'a la fin de la competición nun sumó nengún puntu.
Desconocer con certidume cómo empezó a usase la cuyar de madera nel rugby,[10] pero hai la posibilidá de que los xugadores que yeren estudiantes de Cambridge, que yeren numberosos entós, trataren d'estender el vezu estudiantil y depués perpetualu una vegada que foi prohibida na universidá, hipótesis qu'acueye la Rugby Football Union inglesa.[10] En 1894 el periódicu South Wales Daily Post espublizó que, nel marcu de los Home Nations Championships (Cuatro Naciones, ensin Francia nin Italia), el partíu ente Irlanda y Gales decidiría "quién sería'l ganador de la inominiosa Cuyar de madera",[11] que ye una de les primeres menciones rexistraes del usu del conceutu nel mundu del rugby. La primer cuyar de madera de la hestoria del rugby diose a la selección d'Irlanda unos años enantes, en 1884.[10]
Según una segunda versión, un xugador inglés, William Bolton, convenció a los sos compañeros p'apurrir un oxetu absurdu como premiu pa burllase de los xugadores irlandeses, que teníen perdío tolos sos partíos en 1884.[10] La selección irlandesa aceptaría'l troféu y empecipiaríen asina la tradición. Esiste una tercer versión que tendría'l so orixe nel periodismu en 1910, anque de ser cierta negaríase la esistencia de les cuyares de madera anterior. Esta tercer hipótesis básase en que'l conceutu de la cuyar de madera sería una oposición a la espresión inglesa nacer con una cuyar de plata na boca (referente a la xente rico).[10]
En 1983, mientres el Tornéu de les Cinco Naciones, cinco aficionaos ingleses viaxaron a Dublín p'asistir al postreru partíu de la so selección, que perdió contra Irlanda y remató el tornéu con un solu puntu. Nun chigre, tres el partíu, recibieron consolación per parte de trés amigos irlandeses que-yos regalaron una cuyar de madera envuelto nuna bufanda irlandesa. Esti grupu d'amigos ingleses fundó entós una organización non gubernamental llamada Wooden Spoon Society, dedicada a la beneficencia de neños con necesidaes especiales y diversidá funcional.[12][13][14] La so primer recaldación de fondos llevóse a cabu per aciu un partíu benéficu de golf nel Farnham Golf Club gracies al qu'axuntaron 8450 llibres esterlines;[13] l'algame de la Wooden Spoon Society creció notablemente colos años tantu n'algame como en miembros.[15][12] La cuyar que recibieron estos aficionaos ingleses atópase nel Muséu del Rugby de Twickenham.[10]
«Palmarés» por nación dende 1884
Les seleiciones participantes nel Tornéu de les Seis Naciones recibieron les siguientes cuyares de madera:[ensin referencies]
Japanese Students at Cambridge University in the Meiji Era, 1868–1912: Pioneers for the Modernization of Japan[1]Archiváu 2009-02-17 en Wayback Machine, por Noboru Koyama, traducíu al inglés por Ian Ruxton, (Lulu Press, setiembre de 2004, ISBN 1-4116-1256-6). Esti llibru contién información detallada sobre la cuyar de madera en Cambridge.
