La economía d'Uruguái ye'l resultáu de la combinación de los recursos naturales del país con una población altamente alfabetizada, una estructura empresarial diversificada y una fuerte presencia del Estáu.
Si bien históricamente la producción tuvo basada na agropecuaria, nes últimes décades el pesu d'otros sectores de la economía creció considerablemente. En 2009 les actividaes primaries representaben l'8,6% del productu interior brutu, les industries manufactureres el 13,9%, el comerciu el 14,5%, la construcción el 7,3%, el tresporte el 7,5% y otres actividaes el restante 48,2%.[7]
Carauterístiques
Los ganaos ovín y bovín son los más importantes. Carne, llana, cueru y otros subproductos constituyeron siempres les principales esportaciones. La producción de ganáu ovín concéntrase nel norte del país, nos departamentos d'Artigas y Salto anque, en menor midida, alcuéntrase nel restu del país. El ganáu bovín alcuéntrase per tol territoriu, con mas predominiu nel sur del país.
De menor relevancia a nivel históricu, pero n'esponencial desenrollu pa la economía son los cultivos agrícoles, ente ellos, el trigu, l'arroz y la soya.
Los recursos minerales son escasos, pero la industria medró gracies a les importaciones de combustibles y materies primeres. Nel norte del país (Artigas) desenróllase la estracción d'ágates y amatistes, con gran potencialidá de da-y valir agregáu a la so esportación. La eventual esplotación de fierro na zona de Valentines podría cambiar enforma l'actividá, pero'l proyeutu Aratirí entá nun foi aprobáu polos múltiples cuestionamientos de que foi oxetu.
La principal industria ye l'alimenticia (5,8% del PIB), siguida pola fabricación de madera y productos de madera, papel y productos del papel (2,3% del PIB) y la industria química (1,5% del PIB). Una industria que creció a finales del sieglu XX y principios del XXI ye la del software, la que ta efectuando esitoses esportaciones non tradicionales.
La rede de comunicaciones ye bona y el turismu crez rápidamente. El turismu y los servicios financieros constitúin importantes recursos económicos.
Al empar que n'otros países de la rexón, nos años 1990 aplicáronse polítiques d'apertura económica (Mercosur) y de reforma del Estáu.
Tradicionalmente, Uruguái tamién tien elevaos niveles d'educación, bienestar social y curiáu de la salú. L'Uruguái asítiase nel puestu númberu 46[8] alcuerdu col IDH espublizáu pol PNUD nel 2007 con datos referíos al añu 2005.
Uruguái conocióse como la "Suiza d'América", ente otres razones, pola tradicional presencia de numberosos bancos.
Foi particularmente fuerte la crisis bancaria de 2002 n'Uruguái; pero l'Estáu uruguayu sofitó la devolución de depósitos a l'amplia mayoría de los aforradores, y respetóse la moneda orixinal de los depósitos; polo tanto, a la llarga la plaza financiera uruguaya recuperó la confianza del públicu. Significó tamién el final de l'hasta entóncenes habitual costume del Estáu uruguayu d'asistir a los bancos quebraos, y instrumentóse un seguru de depósitos bancarios con cobertoria parcial.[9]
Ye de destacar la esistencia del secretu bancariu nel sistema financieru. Si bien en 2010, el Parllamentu estudió'l so llevantamientu parcial.[10]
Trrs décadrs de proteicionismu y intervencionismu estatal, el llamáu "Neobatllismu", del que'l presidente Luis Batlle Berres foi'l más insigne representante, nos años 1970, en plena dictadura cívico-militar, el ministru Alejandro Végh Villegas implementó una lliberalización de la economía, de la que los efeutos entá se faen sentir: el país abrió los sos mercaos de capitales, dolarizóse la economía, desreguláronse los salarios, promoviéronse les esportaciones non tradicionales y crecieron les importaciones.
Dende llueu, hebo altibaxos; otru ministru de la dictadura, Valentín Arismendi, implementó un sistema de paridá cambiaria conocíu popularmente como "la tablita"; a fines de 1982 fízose insostenible, y se disparó la cotización del dólar norteamericanu, lo qu'ocasionó una severa crisis económica y deterioru salarial. Tres la restauración democrática en 1985 tentóse sopiar los efeutos d'esta política, per aciu de la llamada "flotación sucia", y tratóse de recuperar la capacidá alquisitiva de los salarios al traviés de convocatories a conseyos de salarios.
L'aniciu de los años 1990 baxo'l gobiernu del Partíu Nacional con Luis Alberto Lacalle llevóse a cabu polítiques económiques que güei llamaríemos "neolliberales" qu'implicó una marcada reorientación del desenrollu y una aceleración del crecimientu económicu hasta 1998. Per un llau planteóse l'apertura unilateral, ye dicir, tocántenes a terceros países y marcó'l procesu d'integración rexonal del Mercosur. Pel otru tratóse de privatizar y desregular los mercaos (dexóse de convocar los conseyos de salarios). Al mesmu tiempu instauróse un programa d'estabilización basáu nel ancla cambiaria. La conxunción d'esos factores xeneró una apreciación de la moneda uruguaya respeutu al dólar y una tendencia al déficit comercial provocáu por una fuerte espansión de les importaciones. El patrón de crecimientu xeneráu na década de los noventa nun pescanció superar debilidaes estructurales del sistema financieru, ello ye, nun meyoró la eficiencia de los bancos nin públicos nin privados y l'asignación de créitos nun se realizó d'un xeitu eficiente. Asistióse a un fenómenu de burbuya financiera.[12]
Tres la crisis bancaria de 2002 nel gobiernu de Jorge Batlle Ibañez el país tuvo un repunte nos sos indicadores económicos; pero al mesmu tiempu, hai un estendíu fenómenu de fragmentación social y económica cola mayor crisis financiera al entamu y económica-social nel so conxuntu como nunca sufrió enantes el país, alloñáu de la tendencia histórica a una sociedá hiper-integradora. Foi dempués el gobiernu del Frente Amplio quien volvió a convocar los conseyos de salarios na pescuda d'una redistribución de poder alquisitivu; tameién implementó planes sociales d'aída, del que'l so efeutu a llargu plazu tovía ta por vese.
Dende la crisis de les hipoteques subprime en 2008, Uruguái viose sometíu a periódicos sacudones onde se pón a prueba la fortaleza de la so economía.
Na segunda metá de 2011, y a costafecha de la crisis del techu de delda d'Estaos Xuníos, de les que les sos consecuencies tovía tán por sentise, Uruguái prepárase p'afrontar un axuste del gastu[14] y coordínense aiciones con autoridaees económiques de países de la rexón.[15]
Nos caberos años la industria del software n'Uruguái amosó un importante dinamismu, reflexando un crecimientu de contino de les sos esportaciones. Güei, la industria del software uruguayu representa el 5,7% de les esportaciones totales del país. La industria del software uruguayu tien una clara orientación al desenrollu de productos comerciales y gran esperiencia nel desenrollu y márquetin. Al añu 2004 les ventes de software fueron de 226 millones de dólares y s'esportaron 809 millones de dólares, lo que representa el 39,3%.
Mentanto, el teletrabayu n'Uruguái ta viviendo un nada despreciable nivel d'actividá, que tovía ta por cuantificase.
