Hafez al-Asad (árabe: حافظ الأسد Ḥāfiẓ Al-Asad; 6 d'ochobre de 1930, Qardaha (en) 
– 10 de xunu de 2000, Damascu) foi un políticu siriu, militar y presidente de Siria dende 1971 hasta la so muerte nel 2000 —Asad, n'árabe significa «Lleón»—.
Biografía
De familia humilde, dempués de los estudios primarios recibió formación na academia militar y, pola so valía, foi unviáu a completar la so formación con militares soviéticos. Ingresó nel Partíu Baath Árabe Socialista en 1947 y opúnxose viviegamente a la unificación ente Siria y Exiptu, a pesar de tar destináu en El Cairu. Al fracasar la unificación en 1961, el so prestíu xubió, siendo nomáu Xefe de les Fuercies Aérees en 1964. Mientres ocupaba esti cargu, Siria sufrió una derrota cola perda de casi tola so fuercia aérea y parte del so territoriu na Guerra de los Seis Díes. A pesar d'esta derrota, el so poder nun fixo más qu'aumentar dende la instauración del réxime militar en 1963, y en 1970 aprovechó la so posición pa dar un golpe d'Estáu.
Poco dempués de tomar el poder, empecipió cobardes reformes y amontó la capacidá militar del exércitu. Ello dexó-y aliase con Exiptu en 1973, provocando la Guerra del Yom Kippur contra Israel, coles mires de recuperar los Altos del Golán. El fracasu na operación nun-y restó protagonismu, y averó la política del so gobiernu a la XRSS como firme aliáu. Al-Asad, sobre'l territoriu qu'entiende Israel, Gaza, y Cixordania, dixo: «Palestina ye una parte integrante de la Siria del Sur».[2][3]
Dientro de la estratexa política de la zona, ocupó militarmente El Líbanu en 1976 sol amparu d'establecer una fuercia d'interposición y pacificación. En 1982 tuvo envolubráu n'unu de los episodios más confusos y polémicos del so gobiernu, la masacre de Hama, fechu nel cual acusóse-y d'unviar al exércitu siriu a reprimir una supuesta revuelta suní contra'l so gobiernu, tratándose básicamente d'una insurrección armada de corte golpista encabezada pola Hermandá Musulmana, organización que muncho primero d'esti acontecimientu yá tenía un llargu historial d'actos de terrorismu tantu en Siria como n'Exiptu; la llista de muertos bazcuyó ente 10 000 y 40 000 persones, anque nunca se llegó a una conclusión final sobre'l númberu real de finaos.
Finó d'un ataque al corazón el sábadu 10 de xunu de 2000 y asocedió-y na presidencia'l so fíu, Bashar al-Asad.
Referencies
Enllaces esternos
