Hồ Chí Minh (19 de mayu de 1890, Kim Liên (en) 
– 2 de setiembre de 1969, Ḥanói) foi un revolucionariu y estadista vietnamita.
El so nome nun yera Ho Chi Minh, ésti yera un nomatu que-y dieron que significa aquel que da lluz. El so verdaderu nome yera Nguyễn Sinh Cung (na llingua llocal Nguyen Sinh Coong).
En 1911 entama a trabayar como cocineru nun barcu francés col que percorre tol mundiu. Instálase en Londres nel 1915 y con 21 años va pa Francia, au vive como xardineru. Fai alderiques colos movimientos socialistes franceses y en 1920 ta na fundación del Partíu Comunista Francés. En 1923 foi pa Moscú pa estudiar táutiques de guerra y entra nel Comintern, brazu políticu internacional del Partíu comunista Rusu. Vive en dellos países hasta llegar pa Hong Kong, onde dirixe'l movimientu antimperialista n'Indochina, baxo poder francés dende 1854.
Fechu presu pelos ingleses en 1930, fúgase y refáxase en Moscú. En 1941, funda la Lliga pala Independencia de Vietnam (Vietminh) pa lluchar escontra los franceses. Demientres la Segunda Guerra Mundial fai usu d'esta guerrilla pa combatir a los xaponeses. Al rematar l'enfrentamientu, forma un estáu independiente nel norte de la rexón, Vietnam. Francia contraataca y la Guerra d'Indochina remata nel 1954 col trunfu del Vietminh. El país queda dixebráu en dos cachos.
Ho Chi Minh, presidente de Vietnam del Norte, prepara y sofita a les fuercies del Frente de Lliberación Nacional de Vietnam del Sur (FLN o Vietcong) cola intención de xunir el país. Entama la percélebre Guerra de Vietnam, au los Estaos Xuníos lluchen ensin descansu a lo llargo de 15 años con consecuencies qu'anguaño sufren delles persones nesti país asiáticu.
Esti fechu históricu tien númberos llaceriantes tanto pa los estauxunidenses con casi 60.000 soldaos muertos y 150.000 firíos, como otros países que-y ufrieron el so sofitu, como por exemplu, Australia con 500 muertos y 3.000 firíos.
Algama la traxedia pa los vietnamites con más de 3 millones de muertos y tres millones que sufren ainda anguaño los efeutos del axente naranxa, un poderosu defoliante qu'usaron los estauxunidenses p'arrasar tola viesca tropical del país. Demientres la guerra, Estaos Xuníos llanzó más de 7 millones de tonelaes de bombes y 100.000 tonelaes de sustancies químiques tóxiques.
Ho Chi Minh morrió en 1969 na so casa de Ḥanói a los 79 años d'edá d'un paru cardiacu.
En 1975, Saigón foi rebautizada como Ciudá Ho Chi Minh.
Referencies
Enllaces esternos
