| Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables.
Pues añadiles tu mesmu o avisar al autor principal del artículu na so páxina d'alderique pegando: {{subst:Avisu referencies|Parllamentu de Nueva Zelanda}} ~~~~ |
El Parllamentu de Nueva Zelanda (oficialmente New Zeland Parliament n'inglés y Pāremata Aotearoa en maorí) ye l'órganu llexislativu de dichu estáu oceánicu. Según la Llei de Constitución de 1986, ta formáu pola Monarquía —representada pol Gobernador Xeneral— y pola Cámara de Representantes, que ye comúnmente llamada «Parllamentu». Trátase d'una asamblea unicameral de 120 diputaos, magar en delles llexislatures el númberu d'escaños ye mayor, que son escoyíos por sufraxu universal direutu por aciu un sistema de representación proporcional mista; 70 diputaos son escoyíos en distritos uninominales y el restu en llistes presentaes polos partíos nuna circunscripción única a nivel nacional. La sede del Parllamentu de Nueva Zelanda ta na capital de país, Wellington.
La primer sesión del Parllamentu de Nueva Zelanda, qu'hasta 1986 foi l'Asamblea Xeneral, tuvo llugar el 24 de mayu de 1854 como resultancia de l'Acta de Constitución de Nueva Zelanda (1852), que dotó d'autonomía política a la entós colonia británica. Esti réxime caltúvose, con distintos cambeos, hasta 1947, cuando'l Parllamentu llogró'l control total de tolos asuntos que concerníen al país. Cabo añader que foi bicameral hasta l'añu 1951, yá que esistía una cámara alta denomada'l Conseyu Llexislativu (New Zeland Legislative Council) siguiendo'l modelu de la Cámara de los Lores.
Nueva Zelanda ye una democracia parllamentaria basada, como la mayoría de países anglosaxones, nel sistema Westminster. El partíu o coalición que tien la mayoría de los escaños ye'l que forma gobiernu, pero tamién puede formase un gobiernu en minoría col sofitu parllamentariu d'otros partíos anque nun formen parte del executivu. La Cámara de Representantes escueye d'ente los sos miembros al Primer Ministru, xeneralmente'l líder del partíu o coalición mayoritarios. Este preside'l gabinete que ta formáu por él y los sos ministros, nomaos pol Gobernador Xeneral a propuesta del xefe de gobiernu, y ye amás l'órganu que dirixe l'acción política.
Les últimes eleiciones tuvieron llugar el 23 de setiembre de 2017 y dieron pasu a la LII Llexislatura. Esta ye la composición de la Cámara de Representantes:
Bibliografía
Referencies
Enllaces esternos
