Tonga[12] (en tonganuPuleʻanga Fakatuʻi ʻo Tonga), oficialmente Reinu de Tonga, ye un estáu soberanu d'Oceanía, asitiáu na Polinesia. El so territoriu abarca'l del archipiélagu homónimu, formáu por 169 islles, que tienen una estensión total de 750 km² y tán espardíes per un área de 700.000 km² del océanu Pacíficu Sur. Hai 36 islles habitaes, con una población total de 100.651 habitantes, de los que'l 70% viven na islla principal, Tongatapu. El país, que s'estiende a lo llargo d'una llinia norte-sur de 800 km de llonxitú, ta arrodiáu per Fiji y Wallis y Futuna al noroeste, por Samoa al noreste, por Niue (el territoriu más averáu a elli) al este, por Kermadec (Nueva Zelanda) al suroeste y por Nueva Caledonia (Francia) y Vanuatu al oeste. La so capital, Nuku'alofa, asítiase a 1.800 km de la islla del Norte de Nueva Zelanda.
Ente 1900 y 1970 Tonga foi un estáu protexíu pol Reinu Xuníu, que s'encargaba de los sos asuntos esteriores de resultes de la robla d'un tratáu d'amistá, pero nunca nun foi parte del imperiu colonial de dengún país. En 2010 el país entamó'l camín pa pasar de ser d'una monarquía absoluta a una monarquía constitucional, con una serie de cambios llexislativos que culminaron na celebración de les primeres eleiciones representatives parciales.
_(Polynesia_centered).svg)
