Veriña[2] ye la parroquia más pequeña del conceyu de Xixón, na Comunidá autónoma d'Asturies. Per ella pasa'l ríu Aboño.
En 2005 tenía una población de 194 habitantes.
Asitiada nel occidente del conceyu, ye un importante nudu ferroviariu, ya que cuenta con una estación de Renfe y un apeaderu de FEVE.
Llocalidaes
Sitios
- El Monte
- El Puente Secu
- La Estación
- La Falconera
- La Piñona
- Samartín
Pasáu y presente industrial
Contaba a finales del sieglu XIX con una "Gran fábrica de Licores y Aguardientes", perteneciente a la razón social de los Sres. M. Cuesta y Compañía, asitiada a ochocientos metros de la estación. Según la publicidá de la dómina fabricaba y vendía licores de todas las clases, especialmente el riquísimo ANISETE DE VERIÑA.
Igualmente contó con una importante fábrica azucrera, la primer asitiada n'Asturies d'esti ramu, que tuvo activa hasta los años sesenta, condicionando los cultivos agrícoles de la parroquia y de la redolada dedicaos en bona midida a la remolacha. Establecióse nel añu 1893, con un capital social de 1.500.000 pesetes, y ocupaba una superficie de dos hectaries, nun tarrén averáu a la llinia del ferrocarril de Xixón a Madrid.
La factoría siderúrxica de Veriña (Arcelor), en realidá ta asitiada en tarrén perteneciente a la parroquia de Fresno.
Deporte
Veriña cuenta con unu de los equipos de fútbol base de mayor sonadía del conceyu de Xixón, y que tien algamao importantes trunfos deportivos: el Veriña C.F. Por él pasaron xugadores que con posterioridá llegaríen al profesinalismu de la mano d'equipos como'l Sporting o l'Uviéu.
Fiestes y cultura popular
El 11 de payares celebra la fiesta de Samartín na capiella del mesmu nome, asitiada nun altu averáu a la factoría d'Arcelor.
El nome de la parroquia ye popular nel mundu del folklore asturianu de la mano de José Antonio García Suárez, El Gaiteru de Veriña, anque realmente naciera en Puao en 1928.
Referencies
Enllaces esternos
