Cymuned ym Mhowys, Cymru, yw Tawe Uchaf. Lleolir y gymuned yn ardal Brycheiniog i'r gogledd-ddwyrain o Ystradgynlais ac ar hyd rhan uchaf dyffryn Afon Tawe. Mae'n cynnwys pentrefi Coelbren, Cae Hopkin, Ynyswen a Phen-y-cae. Roedd poblogaeth y gymuned yn 2001 yn 1,516.
Ceir nifer fawr o ogofâu yn y gymuned; yr enwocaf ohonynt yw Ogofâu Dan-yr-Ogof, un o'r systemau ogofâu mwyaf yng ngorllewin Ewrop ac atyniad poblogaidd i ymwelwyr. Mae'r Cerrig Duon yn gasgliad pwysig o henebion o Oes yr Efydd. Yn y gymuned yma hefyd y mae plasdy enwog Craig-y-nos, a adeiladwyd yn 1841 ac a brynwyd gan y gantores Adelina Patti yn 1878. Mae cloddio glo brig yn bwysig yn yr ardal.
Cynrychiolir yr ardal hon yn Senedd Cymru gan James Evans (Ceidwadwyr)[1] ac yn Senedd y DU gan David Chadwick (Democratiaid Rhyddfrydol).[2]
Cyfeiriadau
