Scene da un matrimonio (Séni da 'n matrimòni) l'è na série televiśìva dramàtica śvedéśa dal 1973 scrita e dirèta p'r Ingmar Bergman, vinsidōra 'd un Golden Globe e ad soquànt àtar prèmi cuma 'n Dàvid ad Dunatèl par la Liv Ullmann. I siē epiśòdi uriginàri i èṅ pò stâ mis insém e scurtâ par far-an sù 'n film lung 167 minùt.
Al telefìlm 'l è stâ girâ a Stucólma e a Fårö fra 'l Luj e 'l Utóbar dal 1972.
Sunt
Johan (Erland Josephson) 'l è 'n insgnànt universitàri 'd quarànta-dū an. 'L è spuśâ da déś an cun la Marianne (Liv Ullmann) ch'la gh 'n à trénta-sinc e ch'la lavóra p'r un studi legàl. Insém i gh'aṅ dū putìni pìculi ma i n vànan piò 'd acòrd cuma na vòlta, anc a lèt al ròbi i n vànan minga tant bèṅ. Lò al diś 'd ès'r un pôc eguìsta méntar lē, ch'l'à patî anc 'n abòrt, la n créd minga tant in d'l amōr par chi àtar.
Johan al cunfèsa a sò mujēr ch'al gh'à intensiòṅ 'd andàr via parchè al s è inamurâ dna sò studènta, la Paula, un quèl ch'i saìvan bèla tut a part lē. 'L óm al partìs ma siē méś dòp al tórna a cà esénd ch'al s è stufâ dla śōvna. Al carti dal divòrsi però i vàn'n avànti listés anc se i dū i càtan l'ucasiòṅ ad far sès insém.
Dòp sèt an, in dua i dū i s èṅ arfàt na vita, Johan e la Marianne i s véd'n incóra. I decìdan 'd andàr a dascórar insém in na cà śibìda da di sò amìg.
Culegamènt estéran
