«
A-j-ò magnâ la tèra sèg e la saìva 'd amōr.»
Un viaggio chiamato amore (Un viàś ciamâ amōr) 'l è 'n drama biugràfic dal 2002 ad Michele Placido ch'al cònta la stòria 'd amōr fra la scritōra Sibilla Aleramo e 'l puvéta Dino Campana parténd da 'l lètri ch'i s èṅ mandâ in dla lōr vita.
Par cla pelìcula chè, numinàda a quàtar Nàstar 'd Argìnt, al prutagunìsta Stefano Accorsi 'l à vins la cópa Volpi a 'l 59śum Fèstival ad Venèsia.
Sunt
Durànt la prima guèra mundiàla al puvéta Dino Campana (Stefano Accorsi), rifurmâ da 'l servìsi militàr parchè batśâ mat, al taca a scrìvar dal létri a la scritōra Sibilla Aleramo (Laura Morante), amìga ad Gabriele D'Annunzio. La dóna, ligàda a 'n óm ciamâ Sebastiano (Emiliano Coltorti), l'armàgn prima culpìda da i sò scrit acsè bèi e puètig e pò la s inamóra 'd lò dabòṅ decidénd dònca 'd andàr-'l a catàr in dal paiśèṅ in du 'l stà, a Maré in dla Rumàgna tuscàna. Dòp avēr-ag rigalâ al sò rumànś Una donna, la dóna la fà 'l amōr sèg. I dū i s métan pò insém.
C'n al pasàr dal tèmp Dino al taca pèrd'r al cuntròl di sò nér'v e a piciàr la pòvra Sibilla che però l'armàgn sèg anc se la sò amìga Leonetta (Galatea Ranzi) la gh diś ch'l è 'n quèl da mat. 'D atra part la scritōra l'à patî dimóndi in tuta la sò vita da quànd da ragasōla (Katy Louise Saunders) l'è stada viulentàda da 'n uperàj (Dario Bandiera) o quànd sò màdar (Consuelo Ciatti) l'à pruâ a masàr-as butànd-as śò da 'n palàs. La Sibilla, ch'la gh'à anc l'artrît, la dmanda ajùt a 'n sò èx amànt, Andrea (Alessandro Haber), méntar Dino al finìs in manicòmi.
Culegamènt estéran
