Agnetha Fältskog begûn doe't se 8 jier wie mei pianolessen en song by it koar fan de pleatslike tsjerke. Begjin 1960 foarme Fältskog in muzikaal trio, de Cambers, mei twa freondinnen. Se treden lokaal op yn lytsere sealen, mar giene al gau útinoar fanwegen gebrek oan opdrachten. As fyftjinjierrige stoppe se mei skoalle om har op in sjong karriêre te rjochtsjen.
Solokarriêre (1966–1971)
Fältskog song twa jier by de Bernt Enghardt-band. Yn dy tiid luts Karl Gerhard Lundkvist, in famyljelid fan ien fan de leden fan de band, him werom út syn suksesfolle rock-'n-roll-karriêre en begûn te wurkjen as plateprodusint by Cupol Records. Enghardt stjoerde him in demo-opname fan de band, mar Lundkvist toande allinnich ynteresse yn Fältskog. Se makke har soargen om't er net ynteressearre wie yn de band en se net op de plaat opnaam wurde soene. Se besleat lykwols om it oanbod te akseptearjen en tekene in platekontrakt by Cupol Records. Har selsskreaune debútsingle Jag var saparkär waard opnaam en útbrocht fia Cupol Records. Yn 1968 folge har debútalbum en oant 1971 folgen noch trije albums.
Yn maart 1969 moete Agnetha de sjonger Björn Ulvaeus, en al gau waarden se in koppel.
Yn 1972 spile Fältskog Marije Magdalena yn de Sweedske produksje fan de ynternasjonale musical Jesus Christ Superstar. Dêrnei late har relaasje mei Ulvaeus en harren freonskip mei Benny Andersson en Anni-Frid Lyngstad ta de foarming fan ABBA.
ABBA (1972–1982)
De ynternasjonale trochbraak fan de groep kaam mei it winnen fan it Eurofyzje Sjongfestival foar Sweden mei it liet Waterloo op 6 april1974. Yn de folgjende acht jier hie de popgroep wrâldwiid in soad sukses en skoarde in rige fan nûmer 1-hits.
Mei ABBA brocht Agnetha Fältskog njoggen studio-albums en twa live-album út.
Fuortsetting solokarriêre
Yn maaie 1983 brocht Fältskog har earste solo-album nei ABBA út, Wrap Your Arms Around Me. Oant 1987 folgen noch trije albums. Nei it útbringen fan I Stand Alone út 1987 luts Fältskog har úteinlik foar mar leafst 17 jier werom út it iepenbiere libben en wijde in soad fan har tiid oan astrology, yoga en hynsteriden yn har lânhûs yn Ekerö. Yn april 2004, brocht Fältskog it album, My Colouring Book út. Yn 2013 kaam de opfolger mei de tige koarte titel A út.
Priveelibben
Fältskog waard berne yn Jönköping, Götaland, Sweden, as earste yn in gesin fan twa bern, har heit wie manager yn in warehûs. Agnetha Fältskog hat twa kear boaske west, njoggen jier mei Björn Ulvaeus. Agnetha Fältskog hat út dy twa relaasjes twa bêrn, wêrûnder aktrise Linda Ulvaeus, har âldste dochter.