Henry Symonds

Henry Symonds

Biografía
Nacemento	30 de xaneiro de 1859
Morte	11 de febreiro de 1933 (44 anos) Weston-super-Mare, Somerset. Inglaterra
País de nacionalidade	Británica
Educación	Lincoln's Inn, Londres.
Q89547790	Estudos de moeda británica.
Actividade
Campo de traballo	Numismática
Ocupación	Barrister, numismático
Familia
Cónxuxe	Florence Annie Whitfield .
Premios
1924: Medalla da RNS.

Henry Symonds, nado en Birmingham, o 30 de xaneiro de 1859 e finado o 11 de febreiro de 1933, foi un numismático británico.

Henry naceu o 30 de xaneiro de 1859 no distrito de Edgbaston, en Birmingham, fillo de Mary Leekey, natural de Milverton, Somerset, e de Henry Symonds, natural de Broadwinsor, Dorset.^[1][2][3]

Cursou o seu ensino secundario na Rugby School en Rugby, e posteriormente formouse en Dereito no Lincoln's Inn, en Londres, e ingresou no Real Colexio de Avogados como barrister en 1886.^[2][3]

Durante a súa estadía en Londres era un visitante asiduo do Museo Británico e dos Arquivos Nacionais, onde estudaba e investigaba sobre dous dos seus grandes intereses: a numismática e a xenealoxía.^[3]

O achado de 200 denarios romanos o 21 de maio de 1885 en Leamington, Warwickshire, onde daquela residía, foi o motivo do seu primeiro artigo sobre numismática, en 1886, na revista Numismatic Chronicle, da Royal Numismatic Society, e a este seguiron máis de vinte artigos na mesma revista entre 1887 e 1926, fundamentalmente sobre a moeda británica e de xeito destacado sobre as emisións dos Tudor.^[2][4]

O 8 de novembro de 1915 ingresou no Departamento de Moedas e Medallas do Museo Británico, en Londres, como axudante do seu conservador, George F. Hill e en substitución de C. F. Keary, apartado do labor por problemas de saúde.^[2][3]

Porén, o 12 de febreiro de 1916 deixou o posto no British Museum e abandonou Londres, na procura das súas raíces en Somerset e en Dorset. Este interese xenealóxico levouno a ser o editor, entre 1913 e 1916, de Proceedings of the Dorset Natural History and Antiquarian Field Club.^[3] Pouco despois, incorporouse á Sociedade de Arqueoloxía e Historia Natural de Somersetshire, de cuxo consello formou parte desde 1918 e da que foi secretario honorario entre 1920 e 1925.^[2][5][6] En 1933 publicouse postumamente a súa investigación sobre as orixes xenealóxicas da familia Symonds.^[7]

Á parte da súa faceta académica, Symonds tamén tivo a súa propia colección de moedas británicas, iniciada a finais da década de 1880. Esta colección acabou dispersa, logo de ser vendida en diversas poxas a partir de 1973.^[8]

Entre outras entidades asociativas e académicas, Symonds foi membro da Sociedade Numismática de Londres desde 1885 e, logo duns anos de baixa, reincorporouse á entidade en 1909, xa convertida en Royal Numismatic Society, e permaneceu nela ata a súa morte.^[9] En 1913 accedeu á súa vicepresidencia e en 1924 foi honrado coa medalla de ouro da sociedade.^[10] Tamén foi membro da Sociedade de Anticuarios de Londres (1911).^[2][3]

Henry Symonds casou con Florence Annie Whitfield (1862-1941), de Edgebaston, Birmingham.^[1] Un dos seus fillos foi o crego anglicano, profesor e conservacionista Henry Herbert Symonds (1885-1958).^[6][11]

Symonds faleceu o 11 de febreiro de 1933 na vila-balneario de Weston-super-Mare, en Somerset, onde pasaba o seu retiro.^[6]

• (1924): Medalla da Royal Numismatic Society, de Londres.^[4][10]

Henry Symonds publicou seis artigos no British Numismatic Journal, da British Numismatic Society (BNS), e outros vinte e catro en Numismatic Chronicle, da Royal Numismatic Society (RNS). Esta é unha escolma destas contribucións:^[3][12]

• (1911). "The Bristol mint of Henry VIII and Edward VI". En Numismatic Chronicle. 4ª serie. Vol. 11. RNS. Páxinas 331-350.
• (1913). "English mint engravers of the Tudor and Stuart periods, 1485 to 1688".En Numismatic Chronicle. 4ª serie. Vol. 13. RNS. Páxinas 349-377.
• (1913). "The documentary evidence for the English royal coinages of Henry VII and Henry VIII". En British Numismatic Journal, 10. BNS. Páxinas 127-171.
• (1915). "The English coinages of Edward VI Arquivado 16 de novembro de 2021 en Wayback Machine.". En British Numismatic Journal, 11. BNS. Páxinas 123-167.google.es
• (1915). "The Irish coinages of Henry VIIIand Edward VI". En Numismatic Chronicle. 4ª serie. Vol. 15. RNS. Páxinas 192-229.
• (1917). "The Elizabethan coinages for Ireland". En Numismatic Chronicle. 4ª serie. Vol. 17. RNS. Páxinas 97-125.
• (1921). "The Irish silver coinages of Edward IV". En Numismatic Chronicle. 5ª serie. Vol. 1. RNS. Páxinas 108-125.

• (1933). Memoir of the family of Symonds in Somerset and Dorset. Wessex Press, Taunton.^[13]

• Bothamley, C. H. (1934). "Henry Symonds, F.S.A. Barrister-at-Law Arquivado 16 de novembro de 2021 en Wayback Machine." En Proceedings of the Somersetshire Archaeological and Natural History Society, LXXX. Serie 4ª, XX. Pt. II. Páxinas 73-74.
• Challis, C. E. (2003). "Henry Symonds, FSA: 30 January 1859 - 11 February 1933". En British Numismatic Journal. 73-11. Páxinas 116-119.