Gerhard Renč (němsce Gerhard Rentsch; * 12. meje 1897 we Wjelećinje, † 22. septembra 1982 w Barće) bě ewangelski farar w Bartskej wosadźe a posledni serbski farar tam.
Wón bě pjate dźěćo Wjelećanskeho fararja Měrćina Renča a bratrowc fararja Jana Renča z Ketlic. Jeho starši bratr Jan (* 1884) přewza po smjerći nana jeho zastojnstwo we Wjelećinje a bě tam posledni serbski farar. Gerhard Renč wopytowaše šulu we Wjelećinje a potom Budyski gymnazij. Wot 1916 do 1919 słužeše w němskim wójsku. Po Prěnjej swětowej wójnje studowaše w Lipsku a Tübingenje ewangelsku teologiju. 1923 złoži w Lipsku prěnje a 1924 w Drježdźanach druhe teologiske pruwowanje. Dnja 26. julija 1925 zapokaza so jako farar we Łupjanskej wosadźe. Wot 1. meje 1932 bě Renč farar w Barće, hdźež skutkowaše 34 lět. Tež na wuměnku zastaraše wosadu wot 1966 do 1969 jako wikar a wuhotowaše hač do 1975 dale hdys a hdys serbske kemše. Za čas Druheje swětoweje wójny zastupowaše hač do januara 1944 fararja Alberta w Malešecach a potom fararja Schneidera w Hrodźišću.
Renč bě wot lěta 1925 woženjeny z Hilžbjetu, rodź. Křižanec (1902–1988), młódšej dźowku Hodźijskeho fararja Jana Pawoła Křižana. Zhromadnje měještaj tři dźowki a jednoho syna.
Žórło
- Farar Gerhard Renč njeboh! W: Pomhaj Bóh 1/1983, str. 2
