Michał Ćěsla (němsce Michael Czesla; * 12. nowembra 1809 w Radworju, † po 1852) bě Radworski zahrodkar a gmejnski předstejer. W lětomaj 1848/49 słušeše k wjednikam serbskeho burskeho hibanja.
W meji 1848 organizowaše pod wliwom rewolucije zhromadźizny serbskich burow z Radworja a wokoliny sobu. Z toho nasta burska peticija, kotruž spočatk septembra 1848 na druhu komoru Sakskeho krajneho sejma w Drježdźanach wotpósłachu. Peticija wobsahowa 28 politiskich a socialnych žadanjow wo polěpšenje situacije burskeje ludnosće kaž tež serbskeje rěče a kultury. Ćěsla wuzwoli so za předsydu w juniju załoženeho Radworskeho serbskeho burskeho towarstwa, kotrež słužeše wšěm pozdźišo załoženym serbskim wjesnym towarstwam jako přikład. Wot 1848 do 1852 bě Michał Ćěsla ze zapósłancom Hornjołužiskeho prowincialneho sejma w Budyšinje, hdźež zastupowaše zajimy serbskich burow.
Žórło
- Erhard Hartstock: Ćěsla, Michał. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 578sl.
