Voyager 1 er könnunarfar sem NASA skaut á loft þann 5. september 1977. Geimfarið var hluti Voyager-áætlunarinnar og var því skotið á loft 16 dögum á eftir tvíbúrageimfarinu Voyager 2. Voyager 1 hefur verið starfandi í 40 ár og 5 mánuði og er ennþá tengt Deep Space Network þar sem það tekur á móti skipunum og skilar gögnum til jarðar. Þann 2. janúar 2018 var það 21 milljarða km frá jörðinni og er það geimfar sem hefur farið lengst frá jörðinni allra.
Meðal markmiða Voyager 1 var að fljúga framhjá Júpíter, Satúrnusi og stærsta tungli Satúrnasar Títani. Þó hægt hefði verið að láta Voyager 1 fljúga framhjá Plútó var ákveðið að mikilvægara væri að senda það til Títans því vitað var að það væri með töluverðan lofthjúp. Það safnaði gögnum um veðurfar, segulsvið og hringina um pláneturnar tvær. Voyager 1 var fyrsta geimfarið sem tók skýrar myndir af tunglum plánetnanna tveggja.
Eftir að aðalleiðangri Voyager 1 lauk þann 20. nóvember 1980 þegar það flaug framhjá Satúrnusi varð það sá þriðji af fimm manngerðum hlutum sem hafa náð þeim lausnarhraða sem þarf til að fara út úr sólkerfinu. Þann 25. ágúst 2012 fór Voyager 1 út úr sólvindshvolfinu og inn í miðgeiminn.
Áætlað er að starfsemi Voyager 1 haldi áfram til ársins 2025 en þá munu rafalar þess ekki framleiða nógu mikið rafmagn til að knýja það áfram lengur.
