Jami greujde op in Iran, es zoon vaan 'ne liberalen dokter en 'n ma die zich later tot 't christendóm zouw bekiere. Es zoon van 'nen dokter had Jami privileges in 't islamitisch Iran. "Mien groetawwers waore nog moslim, meh m'ne pa waor neet-religieus en heet miech altied vrij gelaote um mienen eige weeg te zeuke op dat gebeed", verklaorden 'r in 'n interview euver zien optrèkking.[1]. In 'n ander interview verklaort 'r tot z'ne pa nog ummer 'ne moslim is. [2] De politieke activiteite vaan Jami senior zörgde evels deveur tot de familie 't land oet mós vlöchte. Mèt zien awwers en zie zöster vertrok de daan 11-jäörege Jami nao Nederland. Later kraog heer de Nederlandse nationaliteit.
Jami studeert in Nederland bedriefskunde. Heer woort in 2003 lid vaan de PvdA en woort in miert 2006 gekoze in de gemeinteraod vaan Leidschendam-Voorburg.
Nao de aonslaoge op 't World Trade Center in New York in 2001 verdeepde Jami ziech in de Koran en Ahadith, boenao heer concludeerde tot heer ziech neet demèt kós identificere. Jami waor hendeg teleurgestèld wie 'r oontdekde "wee Mohammed werkelek waor".[3] In 2007 riechden 'r same met Loubna Berrada, opriechster van de Adviescommissie Integratie van de VVD, 't Centraal Comité veur Ex-moslims op.[4] De organisatie is trop geriech 't islamitisch taboe op Gluifsaofval te doorbreke en mie hölp te beie aon bedreigde ex-moslims. Berrada stapde kort nao de opriechting weer oet 't comité, umtot ze voont tot Jami d'n islam te väöl ter discussie stèlt: "Iech vin 't neet hendeg um d'n islam zelf ter discussie te stèlle. Neet slum. Dao wèl iech miech neet in minge. Haw 't bij: de moos oet d'n islam kinne trejje zoonder bedreig te weure. Punt."[5] PvdA-partijleismaan Wouter Bos gaof later kritiek mèt 'n vergeliekbaar strekking.[6]
Op 4 augustus 2007 woort Jami in zien woenplaots Voorburg aongevalle door drei manslui, 2 Marokkane en eine Somaliër, dinkelek vaanwege zien kritiek op d'n islam en beleideginge nao de Profeet Mohammed. Dit waor hendeg intimiderend veur häöm en 't waor neet d'n ierste kier tot heer bedreig woort. Sins dit lèste incidint heet Jami extra beveiliging gekrege i.o.v. de Nationale Coördinator Terrorismebestrijing.
