Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Keertsje vaan Zuid-Nederland
Zuid-Nederland is 'n regio in Nederland. Neve statistisch en economisch, veurnaomelek op 't gebeed vaan de EU, höbbe de Nederlandse regio's gein inkel beteikenis. Evels gief 't wel ummertouw mie lui die vaan meining zien tot de regio's mie mach mote kriege, en de provincies zjus minder. Eindhove weurt dèks officieus es de hoofstad gezeen vaan 't Zuie, dewijl 't neet ins de hoofstad vaan häör eige provincie, Noord-Braobant, is. Deze titel krijg zie neet allein dèks vaanwege väöl Zuid-Nederlandse instanties mer ouch door häör centraol ligking vaan de regio, 't economisch belang vaan Limbörg en Braobant en 't cultureel euvergangsgebeed vaan de Peel roontelum Eindhove, dat bekind steit um zienen historischen en taolköndegen euvergaank vaan Braobant nao Limbörg. Eindhove is daoneve ouch de groetse stad vaan de regio.
Geografie
Zuid-Nederland heet 'n oppervlak vaan 7.290,98 km² en 'n inwoenertal vaan 3.585.148 volges de census vaan 30 september2011. Daomèt heet Zuid-Nederland de hoegste bevolkingsdeechde vaan Nederland op Wes-Nederland nao, naomelek: 512 inw./km². Zuid-Nederland is d'n einsegste Nederlandse regio dee aon mie es eine Belsje regio grens (naomelek twie) en d'n einsegste Nederlandse regio dee grens aon zoewie Duitsland es Belsj. 'r Steit ouch bekind es d'n einsegste regio die heuvelechteg is in 't gaans laand.
't Geografisch middelpönt vaan Zuid-Nederland ligk zjus get te zuie vaan 't binnestedsje vaan Eersel, wat meh 18 kilometer vaan Eindhove aofligk.
Provincies en distrikte
Dèks weurt de provincie Zieland gezeen es 'n deil vaan Zuid-Nederland, evels besteit Zuid-Nederland mer oet twie provincies en COROP-gebeje, naomelek:
