Adolf Albin

Adolf Albin (* 14. September 1848 in Bukarest; † 22. März 1920 in Wien) weer en Schachmeester un -theoretiker ut Rumänien.

Adolf Abin hett dat Schachspelen erst mit 22 Johr lehrt. He wurr in dat stark besett Turnier 1893 in New York Tweet achter Emanuel Lasker, bleev aber vör Eugene Delmar, Francis Joseph Lee, Jackson Whipps Showalter, James Moore Hanham, Harry Nelson Pillsbury un annern. Een Johr later, weer in New York, wurr he Tweet achter Wilhelm Steinitz bi de sien letzten Turniersieg. He weer ok Deelnehmer an dat berühmte Turnier vun Hastings 1895, keem dor aber blots up en achteren Platz. 1901 in Wien deel he sück den 3. Platz mit Georg Marco noch vör Julius Perlis un annern. Carl Schlechter wunn dat Turnier vör Simon Alapin. Sien letzt Turnier speel he 1915 in Wien (6. Trebitsch-Turnier), wo he noch mal Platz 5 bi 8 Deelnehmer recken dee.

Albin hett ok mehrere Wettkämpe bestreeden, dorünner 1894 in New York gegen Jackson Whipps Showalter (7:10 bi 9 Remisen), 1900 in Wien gegen Simon Alapin (1:1 bi 4 Remisen), 1901 in Wien gegen Georg Marco (2:4 bi 4 Remisen) un 1918 in Wien gegen Richard Réti (1:1). Sien hööchste historsch Elo-Tall bedroog 2643 in‘n August 1895. Dormit leeg he dormals up Platz 15 vun de Weltranglist.

De Schachtheorie hett he dör dat Ünnersöken vun en Afspeel ut dat Daamgabit utwiet, dat den Naam „Albins Gegengambit“ kreegen hett (1. d2–d4 d7–d5 2. c2–c4 e7–e5). Dat wurr vun hüm 1893 gegen Lasker in de Turnierpraxis inführt un later ok vun Alexander Alexandrowitsch Aljechin af un to bruukt. Buterdem speel Albin 1890 in Wien as Eerst de later as Aljechin-Chatard-Angreep bekannt wurrn Variante gegen de Franzöösch Verteidigung. Sien 1872 herutbrocht Wark Amiculu Jocului de Schach weer dat eerste Schachbook in rumäänsch Spraak.

Michael Lorenz hett in Chess Note 11752 (March 8, 2020) nahwiest, dat Albin an‘n 22. März 1920 storven is, un nich (as bither annommen) an‘n 1. Februar 1920.^[1]

• Olimpiu G. Urcan: Chess fathering a nation. Moravian Chess, Olomouc 2004, ISBN 80-7189-514-8.
• Olimpiu G. Urcan: Adolf Albin in America. A European Chess Master’s Sojourn, 1893–1895. McFarland, Jefferson 2008. ISBN 978-0-7864-3010-9.
• Adolph (sic!) Albin: Schach-Aphorismen und Reminiscenzen, Sülvstverlag, Hannover 1899.

• Olympiu G. Urcan: Adolf Albin and the Genesis of the Albin Counter Gambit Part I (Memento vun’n 4. Juni 2011 in dat Internet Archive) (PDF; 226 kB) bzw. Part II (Memento vun’n 9. Juli 2011 in dat Internet Archive) (2004; engelsch; PDF; 144 kB)

1. ↑ "Chess Note 11752" at www.chesshistory.com