Claus von der Decken (Stood)

Claus von der Decken (* 1460; † 1541) weer siet 1501 Börgermeester von Stood.

Von der Decken weer to siene Tied een von de mächtigsten Lüüd an de Ünnerelv^[1] un de Stammvader von all veer Stammlienen von de Familie von der Decken, de nu noch leven doot.

Wohrschienlich harr he den Bremer Arzbischop Christoph hulpen, de Ridderschop, mit de de vörherige Arzbischop Johann III. Probleme harr, to begööschen, un hett sik so siet 1511 unentbehrlich maakt. He hett den Arzbischop ok mit gröttere finanzielle Vörschüss hulpen.^[1]

1516 hett von der Decken dorför von Christoph en Privileg kregen, dat em un siene Nakamen unafhängig maken dee.^[1]

En Bild von siene Leistungen gifft en Tüüg, de 1577 in en Prozess twüschen Stood un Hamborg vernahmen worrn is. He seed, dat de Börgermeester von der Decken sik mit Spood gegen den Hambörger Elvtoll wehrt harr un dat dat denn en Vergliek twüschen de Stadt Stood un Hamborg geven hett, dat se den annern free passeren laten wullen. De Tüüg seed, dat de Hambörgers jümmer seggt, de Stoder kunnen dor veel Geld för utgeven, wenn se noch wedder so Börgermeesters hebben kunnen as Claus von der Decken un sien Söhn Herrmann. Na Herrmann sien Dood hebbt de Hambörgers den Toll wedder infeddert.^[2][3]

To de Tied geev dat in Stood keen enkelten Börgermeester, man veer, von de jümmer twee ümschichtig för een Johr dat Amt utöövt hebbt.

Claus harr acht Kinner. Von de söss Söhns hebbt fiev de Lienen von de Familie begrünnt:

• Hermann (–1550), weer ok Börgermeester von Stood. Em hebbt de Göder Oerichsheil, Balje un dat Stammgood Kamp tohöört. Hermann hett de eerste Stammlien begrünnt, de Oerichsheiler Lien. He hett 1521/1522 in Rostock studeert.^[4]
• Thomas (–1567) weer däänschen Riddmeester op Schölisch un Bullenhusen. Thomas hett de twete oder Schölischer Stammlien begrünnt, de bet 1700 bestahn hett.
• Heinrich (–1555) weer däänschen Oberst op Stellenfleet III un IV un Wechtern I. Heinrich hett de drüdde oder öllere Stellenflether Stammlien begrünnt.
• Claus (1516–1588), op Stellenfleth I un II. Claus hett de veerte oder jüngere Stellenflether Stammlien begrünnt.
• Johann (–1557), op Schölisch I, Bossel, Allwöörden, Blockland un Wechtern IV. Johann hett de föffte oder Bosseler Lien begrünnt.

1. ↑ ^{a b c} Krause: Decken, Claus von der. In: Allgemeine Deutsche Biographie (ADB). Band 5, Duncker & Humblot, Leipzig 1877, Sied 1
2. ↑ Thassilo von der Decken: Anmerkungen zu den Stammtafeln der Familie von der Decken, 1998, 878 Seiten, S. 19
3. ↑ Urkunde im Stadtarchiv Stade Rep. 27 H 751, Band XIII
4. ↑ Datenbank der Matrikel der Universität Rostock Hermanus van Deken

• Wilhelm von der Decken: Die Familie von der Decken. In ihren verschiedenen Verhältnissen, Hannover Klindworth's Hof-Druckerei 1865 Vierte Abtheilung: Urkunden zur Geschichte der Familie von der Decken S. 5-15
• Herwart und Tassilo von der Decken: Stammtafeln der Familie von der Decken, 1994 S. 2
• Thassilo von der Decken und Heinz-Joachim Schulze: Die Familie von der Decken und die Stadt Stade im Übergang vom Mittelalter zur frühen Neuzeit, Stader Jahrbuch 1993/94 S. 13-57