Düsseldörp (Hoochdüütsch: Düsseldorf) is en Stadt mit över 610.000 Inwahners in Düütschland. Se is de Hööftstadt vun Noordrhien-Westfalen un tweedgröttste Stadt nah Köln in Noordrhien-Westfalen. De Stadt liggt an den Rhien, twischen Duisborg un Köln. Fröher weer de Stadt de Hööftstadt vun't Bergische Land.
Sprake
In dat hüdige Düsseldörp liggt ok de Oort Benrath. Twischen Benrath un Düsseldörp-Oldstadt liggt de Benrather Linie, dat is de ole Grenz twischen Platt und Hoochdüütsch. Nich bannig vele Lüüd in Düsseldörp snackt Platt, man de Lüüd, de Platt snackt, snackt dat Platt vun'n Rhien.
Historie
De eerste schriftlich Nömmen van Dusseldorp stammt ut dat Johr 1135. Ünner Kaiser Frerich Barbarossa is de Oort Kaiserswerth in’t Noorden van Düsseldörp to een good fasten Butenposten ümwannelt wurrn. Van dor ut hebbt Soldaten denn die Rhien beobacht. Kaiserswerth is 1929 Stadtdeel van Düsseldörp wurrn.