Franzenborg

Wapen/Flagg	Koort
Basisdaten
Bundsland: Neddersassen Landkreis: Cuxhoben Gemeen: Cuxhoben
Inwahners:
Postleettall:	27478
Vörwahl:	04723
Geograafsche Laag:	Koordinaten:53° 49′ N, 8° 40′ O53° 49′ N, 8° 40′ O

Franzenborg (hoochdüütsch Franzenburg) is en Oort in de Gemeen Cuxhoben in’n Landkreis Cuxhoben, Neddersassen.

Franzenborg liggt an’n Rand von de Cuxhobener Küstenheid na de Masch hen.

De Naveröörd sünd dat Westerenn von de Worth in’n Oosten, Godendörp in’n Süden, Ox in’n Süüdwesten un Olenwoold in’n Noordwesten. Mit Godendörp un Olenwoold is Franzenborg vondaag tohoopwussen.

1590 hett de Loonborgsche Hertog Franz II. en Borg boon laten, de denn na em Franzenborg heten hett. De Borg stünn op Hadler Rebeed an de Grenz na Wusten. De Borg weer mit Gravens en Veerkant von 100×100 m, de Borganlaag sülvs ahn Graven so bi 60×60 m groot. De Borg hett aver bloots bet 1644 stahn, as Hertog August de Borg hett afrieten laten. To de Borg hett en Vörwark höört, dat 357 Hektar groot weer. Dit Vörwark hett as Domään noch bet 1949 bestahn.

In’n Eersten Weltkrieg sünd 16 Soldaten ut Franzenborg fullen oder vermisst, un in’n Tweten 77^[1].

In de Franzosentied von 1810 bet 1814 hett de Oort to de Mairie Worth in’n Kanton Ritzbüttel höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

Franzenborg hett fröher to dat egenstännige Land Hadeln tohöört un von 1852 af an denn to dat Amt Oterndörp. 1885 is de Oort Deel von’n Kreis Hadeln worrn un 1932 von’n Landkreis Land Hadeln. 1977 is dat denn an’n Landkreis Cuxhoben kamen.

An’n 1. Juli 1968 is de Gemeen Franzenborg mit Olenwoold, Godendörp un Ox tohoopgahn un an’n 1. Juli 1972 is Franzenborg bi de Gemeenreform in Neddersassen denn tohoop mit Olenwoold Deel von de Gemeen Cuxhoben worrn. De Oort is nu en Deel von de Oortschop Olenwoold binnen de Gemeen Cuxhoben.

Franzenborg is evangeelsch-luthersch präägt un höört to dat Kaspel von de Krüüzkark in Olenwoold. Bet in dat 20. Johrhunnert rin hett de Oort aver noch to dat Kaspel von de Jacobi-Kark op de Worth höört.

För de Kathoolschen is de Twölv-Apostels-Kark in Olenwoold tostännig, de siet 2008 to de Karkengemeen St. Marien in Cuxhoben tohöört.

Dat Wapen wiest op gollen Grund un grönen Schildfoot en rood Gebüüd mit roden Toorn, swart Door, Dack un Toorndack. Dat Gebüüd steiht för dat Doorhuus von de Domään Franzenborg, wat de eenzige nableven Rest von de ole Franzenborg is.

Op’n Karkhoff in Franzenborg gifft dat en Denkmaal för de Fullenen ut de twee Weltkrieg’.

De Schützenvereen is 1906 grünnt worrn.

För Franzenborg is de Freewillige Füürwehr Olenwoold mit tostännig. Fröher harr de Oort en egen Füürwehr, de sik siet 1979 al en Sprüttenhuus mit de Füürwehr Olenwoold deelt hett. An’n 1. Februar 2010 sünd de beiden Füürwehren ok organisatoorsch tohoopleggt worrn un de egenstännige Füürwehr Franzenborg hett ophöört, to existeren.

Franzenborg is över de Kreisstraat 12 un 9 mit de Landsstraat 135 verbunnen. De L 135 is in’n Noorden denn mit de Bundsstraat 73 verbunnen, de in’n Noorden na Cuxhoben löppt un in’n Oosten na de Autobahn 27 (Afsnidd Cuxhoben–Bremerhoben) geiht. De K 9 löppt in’n Oosten na de Worth un de K 14 in’n Süüdoosten na Köstersweg un Wanhöden.

De nächsten Bahnhööv sünd in Cuxhoben (so bi acht Kilometer weg) an de Bahnlien Bremen-Cuxhoben un de Nedderelvbahn na Hamborg un in Noordholt an de Bahnlien Bremen-Cuxhoben (so bi söss Kilometer weg).

De Kinner güngen bet 1885 in de Worth na School, denn hett Franzenborg en egen Volksschool kregen. 1920 un 1964 sünd denn noch twee Maal wedder ne’e Schoolhüüs boot worrn. 1968 is de School denn von en Volksschool to en Grundschool worrn, de nu bloots noch för de Klassen 1 bet 4 tostännig weer, dorför kemen denn aver ok de Schölers ut Godendörp, Olenwoold, Arensch, Berensch un Ox na Franzenborg. De School harr 2011 so 230 Schölers.

In’n Oort besteiht ok de Kita Franzenborg, de 2012 inricht worrn is, as de Kinnergoorn Piratennest ut Olenwoold na Franzenborg ümtagen is.

1. ↑ http://www.denkmalprojekt.org/dkm_deutschland/franzenburg_wk1u2_ns.htm
2. ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 76
3. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 156
4. ↑ Franz Heinrich Ungewitter: Neueste Erdbeschreibung und Staatenkunde. 1858, Sied 422: http://books.google.de/books?id=ZkoNAQAAIAAJ&pg=PA422
5. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 148
6. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 159
7. ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 68
8. ↑ Inwahnertallen op gemeindeverzeichnis.de
9. ↑ ^{a b c} Inwahnertallen op verwaltungsgeschichte.de

Franzenborg. Mehr Biller, Videos oder Audiodateien to’t Thema gifft dat bi Wikimedia Commons.