De Kieren (Sternidae), ok Kierits, Krietsteerns, Kweetjes un Kwittjes, Steerenks un Steerms sünd en Familie mank de Tüütvagels (Charadriiformes). Se laat en beten na Möwen, un weert vundeswegen vun en Reeg vun Schrievers ok mank de Möwen (Laridae) insorteert. Man amenne sünd se lüttjer, smaller un wat steviger. Anners, as de Möwen sünd de Kieren echte Treckvagels. Over Winter hoolt se sik in de Tropen up, oder ok, as de Steern, ganz in de Antarktis. Weltwiet gifft dat 12 Geslechter un 45 Aarden vun Kieren.
Kennteken
Kieren sünd mit 24 bit 40 cm Längde lüttjer, as Möwen. Se sünd slanker un hefft smalle Flunken. De Steert wiest en düüdliche Gavel. De Snavel is spitz un wiest bi dat Flegen faken na nedden. De Feddern sünd normolerwiese witt bit grau. Allerhand Aarden dreegt en swatte Huben.
Wo se leven doot
De meisten Aarden mank de Kieren leevt an de Waterkant an’e See, man en poor Aarden sünd ok tohuse an Waters in dat Binnenland. To’n Overwintern in’n Süden sünd se lange Strecken unnerwegens.
Wie se leven doot
Kieren boot ehre Nester up’e Eer oder up Felsen. Faken bröödt se in Kolonien. De Nester liggt meist bannig dicht bi’nanner. Dat kann angahn, dat sik dat dor bloß um eenfacke, naakte Kuhlen bi hannelt. Kieren ut dat Binnenland boot flacke Nester ok up Swemmplanten in’n Sump.
Dat is man roor, datt Kieren swemmen doot. Wenn se Freten söökt, rüddelt se in’e Luft un stört´ denn hendaal, wenn se na Fische dükern wüllt.
