Nadja Uhl

Nadja Uhl (* 23. Mai 1972 in Stralsund) is en düütsche Schauspelerin.

Nadja Uhl is in de DDR boren un opwussen. As Schölerin harr se al den Wunsch Schauspelersche to warrn. Ehr Utbilln dorför hett se in Leipzig afleggt an de Hoochschool för Musik un Theater „Felix Mendelssohn Bartholdy“. 1994 hett se ehr eerst Engagement kregen an dat Hans Otto Theater in Potsdam. Dor hett se verscheden Rullen speelt, as de Viola in Shakespeares Twelfth Night or What You Will (dt.: Was Ihr wollt), Polly Peachum in Brechts Die Dreigroschenoper, dat Gretchen in Goethes Faust oder de Paula in Plenzdorfs Legende vom Glück ohne Ende.

Ehr eerste Filmrull harr se sogor noch wat ehrer, 1993, to’n Enn vun ehr Studium hen in Der grüne Heinrich. Af 1995 töög se de Arbeit in Film un Feernsehn vör. Ehrn Dörbrook harr se 2000 in Schlöndorffs Film Die Stille nach dem Schuss, wo se de utflippte Arbeitersche Tatjana speelt hett. Se weer sietdem in vele Speel- un Feernsehfilmen to sehn, ü.a. ok in de nedderlännsch-düütsche Koprodukschoon De Tweeling, de sogor as Best frömdsprakig Film för den Oscar nomineert weer. Acht warrt an Uhls Schauspeelkunst sünners ehr Anlaag, sik düchtig wanneln to künnen.

Na vele Johren in Berlin-Mitte leevt Uhl vundaag in Potsdam. Ehr Levenspartner es Gewarfsföhrer vun den Potsdamer Vereen „Maulwurf“, de sik üm straaffallig worrn juge Lüüd kümmern deit. An’n 27. Mai 2006 hett se dor tohopen mit em dat Varieté Walhalla apenmaakt. Dat Programm schall mit Kollegen vun Uhl schapt warrn in Kooperatschoon mit dat Hans Otto Theater un annere kulturelle Inrichten.^[1] Uhl hett en Dochter.

För ehr schauspelerisch Wark hett Nadja Uhl ut al en poor Filmpriesen kregen. Se weer tosamen negen mol nomineert un hett söss mol de Utteken kregen:

• 2000: den Sülvern Boor vun de Berlinale as Beste Dorstellerin för Die Stille nach dem Schuss
• 2003: den Bambi för’t Feernsehspektakel vun’t Johr för Das Wunder von Lengende
• 2005: den Sülvern Hugo vun’t Chicago International Film Festival as Best Dorstellersche in Sommer vorm Balkon
• 2005: den Sünnerpries vun’t Baden-Baden TV Film Festival för Mord am Meer
• 2007: den Publikumspries vun de Marler Koppel vun’n Adolf-Grimme-Pries as Hööftdorstellersche in Nicht alle waren Mörder
• 2007: den Jupiter as Beste Feernsehdorstellersche för Die Sturmflut

1. ↑ Bericht in dat Berliner Daagblatt „Tagesspiegel“ vun’n 27. Mai 2006

• Nadja Uhl in de Internet Movie Database (engelsch)
• Fotosammlung