De Río Copán oder Río Grande o Camotán is en 73 Kilometer langen Stroom in dat Departamento Copán (Honduras) un dat Departamento Chiquimula (Guatemala), de in’n Río Grande de Zacapa münnt.
De Stroom billt sik in Santa Rita, wo Río Amarillo un Río Gila tohoopfleten doot. Tohoop mit Río Amarillo (un Quebrada Ruizal) is de Stroom also noch 44 Kilometer länger (117 km). Von dor flütt he na Süüdwesten jümmer mit de Straat CA-11 an’t Noordöver langs. De Río Copán flütt dör de Stadt Copán Ruinas (mit de Maya-Ruinen von Copán) un an Rincón del Buey langs. En poor Kilometer achter Rincón del Buey löppt he denn över de Staatsgrenz na Guatemala un nimmt dorbi den ne’en Naam Río Grande o Camotán an. Twüschen de Öörd El Valle un Shalaguá nimmt he von links toeerst den Río Jupilingo un denn den Río Shalaguá op un ännert sien Kurs na Noordwesten. He löppt an Lelá Obraje (mit Brügg von de CA-11), Camotán un Jocotán langs, wo he von links de Quebrada Torjá opnimmt.
Toletzt flütt he bi Tapazán mit’n Río Grande (oder Río San José) tohoop, de von Chiquimula her kummt, un billt dormit den Río Grande de Zacapa. Dat Water flütt denn över Río Grande de Zacapa in’n Río Motagua un toletzt in de Karibische See.
