De Oort kummt an’n 19. Juli 1325 as Ritsebutle toeerst in de Oorkunnen vör, as Wolderik Lapp in en Verdrag toseggt, dat he nich mehr gegen Jan von Stotel un Luder von Wersebe angahn will. De Naam kummt wohrschienlich von en Vörnaam Rikert oder Rike un dat Woord -büttel un bedüüdt denn soveel as Rikert sien Wahnsteed.
De Borg Ritzbüttel is so üm 1340 rüm boot worrn un hett de Familie von Lapp tohöört. Nadem Hamborg de Borg 1393 belagert un innahmen harr, hebbt Lapp sien de Borg und de Ümgegend, de nadem Amt Ritzbüttel heten hett, an’n 31. Juli 1394 an Hamborg verköfft. Dat harr för Hamborg besünner Bedüden, denn so harr Hamborg Kuntrull över de Elvmünn un harr Togang to en Haven, de dichter bi de Noordsee leeg un ok bi starken Iesgang op de Elv noch to bruken weer.
Dat Regeer över dat Amt harrn Amtlüüd ut Hamborg (mehrstendeels Senaters), de in de Borg Ritzbüttel, later dat Slott Ritzbüttel, jemehr Seet harrn.
An’n 13. Dezember 1872 hebbt sik denn de beiden Öörd Ritzbüttel un Cuxhoben tohoopslaten un hebbt denn bloot noch Cuxhoben heten, ofschoonst Ritzbüttel vörher jümmer de gröttere un wichtigere Oort wesen weer. Vondaag sünd de beiden Öörd kumplett tohoopwussen.
Disse List warrt dör dissen Bot in wisse Tiedafstänn von Wikidata ut automaatsch nee tohoopstellt. Wenn du disse List von Hand ännerst, denn geiht dat bi dat nächste Update wedder verloren!
