A Quick One er det andre studioalbumet til det engelske rockebandet The Who, utgjeve den 9. desember 1966. Det amerikanske plateselskapet deira, Decca Records, gav ut albumet med tittelen Happy Jack, i staden for den seksuelt ladde tittelen på den britiske utgåva. Singelen «Happy Jack» nådde topp 40 i USA. Denne songen var ikkje med på den britiske utgåva av albumet, men vart i staden gjeven ut som singel.
Tilhengjarane til The Who reknar albumet som særs viktig for bandet, sidan dei gjekk bort frå R&B/pop-formatet frå det første albumet. Albumet endar med ein kort musikalsk suite «A Quick One, While He's Away», som fungerte som inspirasjon for dei seinare rockeoperaene som The Who vart kjende for.
Komposisjon og produksjon
Det andre studioalbumet til The Who skil seg frå R&B-stilen på det første albumet. Ein del av marknadsføringa av albumet var eit krav om at kvart bandmedlem skulle skrive minst to songar kvar, sjølv om Roger Daltrey berre skreiv ein («See My Way»). Så dette albumet er det av The Who sine album som er minst dominert av låtskrivinga til Pete Townshend. Det vart spelt inn i IBC Studios, Pye Studios og Regent Sound i London i 1966 med plateprodusenten Kit Lambert. Townshend sa at presset om at alle i bandet skulle skrive songar førte til at singlar han hadde skrivne vart utelate.[1]
«Boris the Spider» vart skriven etter John Entwistle hadde vore ute på fylla med The Rolling Stones-bassisten Bill Wyman. Dei kom opp med morosame namn på dyr, då Entwistle kom opp med songen. «Boris the Spider» vart raskt den mest populære songen til Entwistle, og vart framført fleire tiår seinare. I seinare år gjekk han ofte med eit edderkoppsmykke.
«Heat Wave» var den einaste coververjonen dei spelte på albumet og synte soulpåverknaden til bandet. Det var ein song av Holland–Dozier–Holland og vart erstatta av «Happy Jack» på en originale amerikanske utgåva, men gjeven ut på den doble nyutgjevinga av A Quick One og The Who Sell Out i 1974.
«A Quick One, While He's Away», tittelsporet på albumet, er ein ni minuttar lang song med klipp frå ei soge om utruskap og forsoning. Det var første gongen dei laga eit musikkstykke på forma som førte til «[[rockopera]ene]» Tommy og Quadrophenia.
Keith Moon sin «I Need You» heitte opphavleg «I Need You (Like I Need a Hole in the Head)». Moon meinte at The Beatles talte eit løynd språk bak ryggen hans og denne songen var ein slags hemn mot dei. Sjølv om Moon nekta for at vokalen i ein del av songen var ein imitasjon av John Lennon kunne Entwistle stadfeste at det nettopp var det.[2]
«Cobwebs and Strange» heitte opphavleg «Showbiz Sonata», men Entwistle hevda at melodien kom frå den britiske fjernsynsserien Man From Interpol.[2]
Kvart bandmedlem spelar eit blåseinstrument på «Cobwebs and Strange»: Townshend spelte ei tinnfløyte, Entwistle trompet, Daltrey trombone og Moon tuba.
Plateomslag
Omslaget vart teikna av popkunstnaren Alan Aldridge,[4] og synte bandet som spelte på instrumenta sine. Baksida bestod av fleire svartkvitbilete av bandmedlemmene og ei kort skildring av personlegdomen til kvar av dei. Keith Moon fortel mellom anna spøkefullt at han likte godt å avle høner.
Rolling Stone-skribenten Steve Appleford sa at den lystige popstilen på albumet har ein autentisk kvalitet med bagatellar som «Cobwebs and Strange» som vert vegd opp av «absolutt perfekte, gripande popmelodiar» som «So Sad About Us».[8] Albumet vart seinare skildra som «fascinerande rart» av det same magasinet.[10]
I Christgau's Record Guide: Rock Albums of the Seventies (1981) tok Robert Christgau med den amerikanske utgåva av albumet med i si «grunnleggjande platesamling».[11]Rolling Stone rangerte albumet på 383. plassen på lista si over dei 500 beste albuma gjennom tidene i 2003,[12] og 384. plassen i 2012.[13]
Roger Daltrey – solovokal, trombone på «Cobwebs and Strange»
Pete Townshend – gitar, korvokal, felles solovokal på «A Quick One, While He's Away», tinnfløyte på «Cobwebs and Strange»
John Entwistle – bass, korvokal, solovokal på «Boris the Spider», «Whiskey Man» og felles solovokal på «A Quick One, While He’s Away», valthorn, trompet på «Cobwebs and Strange»
Keith Moon – trommer, solovokal på «I Need You», tuba på «Cobwebs and Strange»
