The Cure es un grop britanic emblematic del pop rock, fondat en 1978. Es actualament compausat de Robert Smith (cant e guitarra), Roger O'Donnell (clavièrs), Reeves Gabrels (guitarra), Simon Gallup (bassa), Perry Bamonte (guitarra e clavièrs) e Jason Cooper (batariá). Devenguts fòrça populars capvath lo monde entièr en plena periòda new wave au bèth miei de las annadas 1980, an fòrça influençat la cultura populara actuala, e pas unicament au nivèu de la musica : per exemple, fòrça monde de la mòda gotica an pres aqueste grop coma referéncia ultima, en particular pr'amor de l'estetica victoriana romantica de lors disques del començament de las annadas 1980 (Charlotte sometimes), que fasián a-n'aqueste moment una musica malenconiosa, per pas díser sinistra, qualificada de còps de cold wave (A forest), e quitament un pauc mai tard son estat prés per modèla pr'amor de lor look post-punk, tot aquò a contribuït de'n far un grop culte.
L'autra fàcia del grop a partir de la segonda mitat de las annadas 1980 es la del grop pop, au sens pròpi coma au sens musical del tèrme, qu'aguèron fòrça tubes entre 1985 e 1993 (Boys don't cry, In between days, Close to me, Just like heaven, Lullaby, Lovesong, High), fasent d'eles a-n'aquesta periòda un dels grops los mai populars de lor generacion. A partir de 1993-1994, The Cure passa un pauc de mòda, la popularitat del grop s'aflaquís pr'amor benlèu de la relèva, ambe la pujada d'una novèla mena de britpop (Blur, Oasis, Dodgy, The Cranberries, Supergrass...).
Lor cançon de 1987 Just like heaven a la particularitat d'èsser culta pr'amor d'una part qu'es una de las mai conegudas de lor repertòri aus Estats Units, e d'autra part pr'amor qu'en França (doncas, en Occitània) a servit a l'epòca (1987-1988) de generic a l'emission televisada Les enfants du rock[1].
