| Derecha política |
|---|
|
posición política |
|
posición política |
 |
Nómase derecha política al conxuntu de posicionamientos o actividaes polítiques qu'acepten o sofiten la xerarquía social o la desigualdá social[1] . Les persones con esta visión de la sociedá consideren la esistencia d'una xerarquía social y de la desigualdá dientro d'ella como daqué inevitable, natural, normal o deseable, y xustifiquen eses idees en nome de la llei natural o la tradición. L'orixe de la xerarquía y la desigualdá permite estremar ente aquellos que creen que surde de les diferencies sociales tradicionales y los que creen que ta orixinada pola competición económica nel marcu d'una economía de mercáu.
La forma d'espresión de la política de dereches varía según les sociedaes y los países. Asina, nos Estaos Xuníos el llinguaxe políticu de la derecha inclúi: antiestatismu, con una desconfianza xeneral nel gobiernu; individualismu; sofitu de la igualdá d'oportunidaes y rechazu de la igualdá de resultaos; y populismu[2] N'Europa, por embargu, tien habío movimientos derechistes coleutivistes perfuertes. Un exemplu ye'l socialcatolicismu, que amuesó siempre'l so refugu a toles formes de lliberalismu, incluyíu l'económicu, y defendió históricamente la harmonía ente les clases, con un paternalismu social que protexe a los trabayadores ensin alterar la xerarquía social[3].
El términu derecha, nel so sen políticu, tien usáose a lo llargo la historia pa denomar diferentes posiciones polítiques. L'apaición de los términos derecha política y izquierda política remóntase a la dómina de la Revolución francesa, y rellacionábase col llugar físicu que los políticos ocupaben nel parllamentu francés; los que se sentaben a la mandrecha de la siella del presidente el parllamentu yeren los que sofitaben les instituciones del réxime monárquicu baltáu pola revolución[4]. Esi grupu formóse como una reacción escontra lo que pasó a definise como la izquierda política, y incluyía a los políticos que sofitaben la xerarquía, la tradición y el clericalismu[5]. L'usu de la espresión entamó a espardese en Francia dempués de la restauración de la monarquía en 1815, cuando entamó a llamase le droit (la derecha) a los ultrarrealistes. Nos países de fala inglesa nun foi hasta'l sieglu XX cuando s'avezó a usar esos términos.
Nel sieglu XIX, ente les décades de 1830 y 1880, prodúxose un cambéu na estructura social de clases del mundu occidental y la so economía, perdiendo puxu social y políticu les xentes pertenecientes a la nobleza y la aristocracia y ganándolo les asociaes cola burguesía y el capitalismu. Esto obligó a los movimientos políticos tradicionales asociaos a la derecha a camudar les sos posiciones, añadiendo a les sos referencies a la tradición el sofitu al nuevu modelu económicu qu'entamó a espardise d'aquella: el capitalismu.
El términu derecha política, que n'orixe designaba namái a los tradicionalistes, conservadores y reaccionarios, tien aplicáose de magar a otros movimientos políticos como los neoconservadores, los nacionalistes, los supremacistes raciales, los demócrata-cristianos, los fundamentalistes relixosos o los lliberales clásicos[6].
Referencies
- ↑ Bobbio, Norberto and Allan Cameron,Left and Right: The Significance of a Political Distinction. University of Chicago Press, 1997, p. 51, 62. ISBN 978-0-226-06246-4
- ↑ Ferrie Pot. Employment Relations and National Culture: Continuity and Change in the Age of Globalization. Edward Elgar Pub, 2000. ISBN 978-1840642292. P. 135-136.
- ↑ Modern Catholic Social Teaching: The Popes Confront the Industrial Age, 1740-1958. Paulist Press, 2003. P132
- ↑ Goodsell, Charles T., The Architecture of Parliaments: Legislative Houses and Political Culture, British Journal of Political Science, Vol. 18, No. 3 (July 1988) páxs. 287–302
- ↑ Rodney P. Carlisle. Encyclopedia of politics: the left and the right, Volume 2. University of Michigan; Sage Reference, 2005, p. 693. ISBN 1-4129-0409-9
- ↑ Iain McLean and Alistair McMillan, The Concise Oxford Dictionary of Politics, Right(-wing)...and for extreme right parties racism and fascism, p. 465, Oxford, 2009, ISBN 978-0-19-920780-0
Ver tamién
