«
P'r al fèsti tut prònt a partìr!»
(Tagline dal film)
Vacanze in America (Vacànsi in Amèrica) l'è na cumèdia dal 1984 ad Carlo Vanzina.
Sunt
Un grup ad studènt dla scóla di prēt “San Crispino” 'd Róma la partìs p'r un viàś ad dū stmani in di Stat Unî. A cumpagnàr-i a gh pénsa don Rodolfo Buro (Christian De Sica), insgnànt ad stòria e 'd geugrafìa cun 'n asènt ùmbar/ciuciàr dimóndi péś. A gh'è anc un prevòstar più vèć, don Serafino (Renato Moretti), che tut i ragàs i tōś'n in gir ad cuntìnuv, e la sgnōra De Romanis (Edwige Fenech), màd'r ad Filippo (Gianmarco Tognazzi).
In d'l aparéć Alessio Liberatore (Claudio Amendola) al cgnós na ragasōla dimóndi bèla, la biónda Antonella (Antonella Interlenghi), che, sibèṅ la gh'àppia bèla 'l muróś, Rocky (Gianfranco Agus), la vrév far sès sèg in tut al manéri ma chi lò al pâr indurminsâ o piutòst tròp un braṿ ragàs. A s sà, al ragàsi bravi i vaṅ in Paradìś, qvéli catìvi dapartùt, dònca lē la s è dascantàda, va mò là.
Dòp soquànt dè a New York, a Memphis par védar la cà 'd Elvis Presley e in dal Tèxas, in dua Peo Colombo (Jerry Calà), un tardòṅ in là c'n i an e sèmpar buciâ, al gh'à la manéra 'd baśàr na pulisiòta, al grup al riva in dal Utah, in dua i màgnan di bucatèṅ ch’Alessio al s éra purtâ da cà dâ da sò pàdar (Enzo Liberti), e pò in dla Val dla Mòrt in dua i fànan na partìda a balòṅ cun di juvintèṅ ad Turèṅ.
Méntar tut i èṅ a Los Angeles, Peo, Pappola (Fabio Ferrari) e De Blasio (Fabio Camilli) i partìs'n ad nòt p'r andàr a śugàr in dla sità dal visi, Las Vegas, ma i pèrd'n incòsa.
Culegamènt estéran
