O Novo Proxecto Común foi a denominación que recibiu o proxecto de reorganización que aconteceu no nacionalismo galego após a escisión que sufriu o BNG no ano 2012. Nel participaron tanto partidos que foran integrantes do BNG, coma Máis Galicia ou Encontro Irmandiño, coma outras formacións políticas e militantes doutros partidos.
Historia do termo
A escisión do BNG
O 26 de xaneiro de 2012 celebrouse a XIII Asemblea Nacional do BNG, na que se elixiu o candidato para presidir a Xunta de Galicia nas eleccións galegas de 2012, así coma a executiva nacional.
Presentáronse tres listas: Alternativa pola Unidade (ApU), co apoio da Unión do Povo Galego e con Guillerme Vázquez para voceiro e Francisco Jorquera para candidato; unha lista encabezada por Máis Galiza e Encontro Irmandiño (+G-EI), co apoio do Colectivo Socialista, Partido Nacionalista Galego-Partido Galeguista, Esquerda Nacionalista, Inzar, Unidade Galega e Espazo Socialista Galego, con Xosé Manuel Beiras para voceiro e Carlos Aymerich para candidato; e unha lista de Movemento Galego ao Socialismo, encabezada por Rafael Vilar.[1][2][3] Finalmente, Guillerme Vázquez resultou reelixido portavoz nacional con 2.123 votos fronte Xosé Manuel Beiras, con 1.823 votos; e Francisco Jorquera candidato á presidencia da Xunta con 2.338 votos (53 %) fronte aos 2.043 votos (46 %) conseguidos por Carlos Aymerich.
Após a asemblea, e por mor de diferenzas internas, o partido liderado por Xosé Manuel Beiras Encontro Irmandiño[4] e máis Esquerda Nacionalista[5] decidiron abandonar o Bloque Nacionalista Galego.
Posteriormente Máis Galiza, a segunda forza máis votada tras a UPG, e o Partido Nacionalista Galego-Partido Galeguista seguiron o mesmo camiño e abandonaron a formación frontista.[6][7]
A reestruturación do nacionalismo
Despois da escisión do BNG, que até o momento fora o partido de referencia do nacionalismo galego, as principais formacións escindidas (Encontro Irmandiño e Máis Galiza iniciaron contactos con outros partidos como Acción Galega (un grupo creado no ano 2012 e integrado, entre outros políticos, por Teresa Táboas e Rafael Cuíña, ex militante do PP e fillo do político Xosé Cuíña) ou Espazo Ecosocialista Galego.[8]
Outros partidos con representación que participaron na reestruturación do Novo Proxecto Común foron Terra Galega, o Partido Galeguista Demócrata ou o Partido Nacionalista Galego-Partido Galeguista, o Partido da Terra, Movemento pola Base ou a Fronte Popular Galega.
En maio de 2012, nace a formación Compromiso por Galicia, integrada nun primeiro momento por tres partidos principais: Máis Galicia, Acción Galega e Espazo Ecosocialista Galego.[9]
O 14 de xullo de 2012 foi celebrada a asemblea para establecer as bases do novo proxecto nacionalista, coa fin de achegar posturas entre o recentemente fundado Compromiso por Galicia e o partido de Beiras Encontro Irmandiño, ademais doutras pequenas formacións.[10]. En dita asemblea estiveron representados case 100 concellos galegos e foi liderada por Xosé Manuel Beiras.[11]
En xullo de 2012 Encontro Irmandiño forma o partido denominado ANOVA-Irmandade Nacionalista.[12][13]
En agosto de 2012 entrar a formar parte de Compromiso por Galicia o Partido Nacionalista Galego-Partido Galeguista (PNG-PG), Esquerda Nacionalista, Espazo Socialista Galego, Unidade da Esquerda Galega, Partido Galeguista Demócrata (PGD),[14][15]
De cara ás eleccións ao Parlamento de Galicia 2012 celebradas en outubro dese ano, ANOVA concorreu en coalición con Esquerda Unida, EQUO e Espazo Ecosocialista Galego (que deixou CxG) nunha alianza electoral de esquerda anticapitalista, denominada Alternativa Galega de Esquerda.[16][17]
En ditas eleccións, Alternativa Galega de Esquerda obtivo o 13,99% dos votos nas eleccións de 2012 e 9 deputados, dos cales 4 corresponden a Anova. Compromiso por Galicia, que finalmente concorreu en solitario, non acadou representación.
Notas
- ↑ Unos 5.300 militantes del BNG se reúnen en su décimotercera Asamblea, Europa Press, 28 de xaneiro de 2012.
- ↑ La reinvención del BNG, El Mundo, 28 de xaneiro de 2012.
- ↑ El BNG contra el BNG, El País, 23 de xaneiro de 2012.
- ↑ Beiras se va tras 30 años en el BNG, La Voz de Galicia, 13 de febreiro de 2012.
- ↑ La dirección de Esquerda Nacionalista acuerda su escisión del BNG "sin vuelta atrás", Faro de Vigo, 12 de febreiro de 2012.
- ↑ Esquerda Nacionalista anuncia su adiós, La Voz de Galicia, 12 de febreiro de 2012.
- ↑ Esquerda Nacionalista y el PNG acuerdan que sus bases ratifiquen la salida del BNG Arquivado 01 de marzo de 2014 en Wayback Machine., El Correo Gallego, 12 de febreiro de 2012.
- ↑ El Mundo (ed.). "El proyecto de refundación del nacionalismo toma forma". Consultado o 6 de febreiro de 2014.
- ↑ Nace 'Compromiso por Galicia', una nueva fuerza nacionalista con "vocación de gobierno" y que pide listas abiertas, 'Europa Press, 23 de maio de 2012.
- ↑ Europa Press (ed.). "Creada una coordinadora del Novo Proxecto Común". Consultado o 6 de febreiro de 2014.
- ↑ Faro de Vigo (ed.). "El Novo Proxecto Común constituirá nueva organización nacionalista". Consultado o 6 de febreiro de 2014.
- ↑ Quen somos? Arquivado 20 de setembro de 2012 en Wayback Machine., páxina web de Anova.
- ↑ "El proyecto liderado por Beiras nace como ANova - Irmandade Nacionalista", La Voz de Galicia, 14-07-2012.
- ↑ El Partido Galeguista entra en Compromiso por Galicia a través del partido de Rafa Cuiña, Faro de Vigo, 3 de agosto de 2012.
- ↑ El Partido Galeguista se une a Compromiso por Galicia, La Voz de Galicia, 18 de xullo de 2012.
- ↑ Esquerda Unida acepta presentarse en coalición con Anova, El Progreso, 4-9-2012
- ↑ Anova e IU se presentarán como 'Alternativa Galega de Esquerda, Europapress.es, 11-9-2012'
Véxase tamén
Outros artigos
Ligazóns externas
