Ivar Bühring Prestbakmo (fødd 7. november 1968) er ein norsk politikar frå Salangen. Han var ordførar i Salangen frå 1999 til 2014, og fylkesordførar i Troms og Finnmark fylke frå 2020 til oktober 2021. Sidan 14. oktober 2021 har han møtt på Stortinget for Troms og Senterpartiet.
Prestbakmo møtte nokre få veker på Stortinget 1993-97 som vararepresentant for Senterpartiet i Troms. Hausten 1999 vart han direktevald til ordførar i Salangen. Han vart attvald i 2003 då Senterpartiet fekk 43 % av røystene, og på ny i 2007 med 58 % av røystene. I 2011 fekk Senterpartiet 45 % oppslutnad, og Prestbakmo heldt fram som ordførar til januar 2014.
Frå 2014 til 2019 var Prestbakmo fylkesråd for samferdsel og miljø i Troms fylkeskommune. Han fekk stillinga etter det sitjande fylkesrådet leia av Pia Svensgård frå Arbeidarpartiet gjekk i oppløysing. Dette fylkesrådet kom med framlegg om å legge ned fleire vidaregåande skular, og ikkje byggje Bjarkøy-sambanda. Eitt nytt fylkesråd, leia av Line Fusdahl frå Høgre og med Prestbakmo som nestleiar tok over og la vekk dei nemnde framlegga. Etter fylkestingsvalet i 2015 danna Senterpartiet eit nytt fylkesråd i lag med Arbeidarpartiet, Venstre og Kristeleg Folkeparti, med Cecilie Myrseth frå Arbeidarpartiet som fylkesrådsleiar. Prestbakmo heldt fram som fylkesråd og nestleiar.
1. januar 2020 byrja Prestbakmo i stillinga som fylkesordførar i det nye Troms og Finnmark fylke. Gjennom stortingsvalet 2021 vart han fyrste vararepresentant til Stortinget frå Troms. Ettersom den valde representanten Sandra Borch fekk plass i Støre-regjeringa, rykte Prestbakmo inn på Stortinget. Han er medlem i Justiskomiteen.
Prestbakmo er frå 2016 medlem av hovudstyre i KS, som ein av tre frå Senterpartiet. Sidan 2017 er han medlem i Senterpartiet sitt sentralstyre.
Kjelder
