Ramón Conde

Ramón Conde

Biografía
Nacemento	18 de decembro de 1951 (72 anos) Ourense, España
Residencia	Santiago de Compostela
Educación	Universidade Laboral de Xixón Universidade de Santiago de Compostela
Actividade
Ocupación	escultor
Obra
Obras destacables Homenaxe a Colemán e Reverter (1991) Monumento ao traballo (1994) Caronte (2007) Arco do triunfo (escultura) (pt) (2010) O Fiel Contraste (2017) O Titán
Sinatura
Sitio web	ramonconde.com

Ramón Ángel Conde Bermúdez, nado en Ourense o 18 de decembro de 1951, é un escultor galego.^[1][2]

Fixo os seus estudos na súa cidade natal até que en 1965 se trasladou a Xixón onde cursou estudos na universidade laboral. En 1969 regresou a Ourense, onde finalizou os seus estudos de bacharelato. En 1971 ingresou na Facultade de Filosofía e Letras da Universidade de Santiago de Compostela. En 1973 vive en Madrid coñecendo fundicións e obradoiros de diversos artistas. A partir de 1974 reside de novo en Ourense onde desenvolve a súa linguaxe plástica. En 1986 trasládase á Coruña onde viviu até 1991, instalando o seu estudo no Polígono industrial de Sabón, en Arteixo. Nestes anos realizou as súas primeiras obras públicas e comezou a súa proxección internacional coa participación en exposicións como a do Salón des Indépendentes, na Exposición Internacional de Nogent Sur Marne, no Espace Delpha e en Lorient. En 1991 inaugúrase a súa obra Os Redeiros na Gran Vía de Vigo. Nese mesmo ano foi para Houston como profesor convidado da Universidade de Houston-Downtown.^[2] Viviu nesta cidade até 1992. Nese ano realizou unha exposición no recinto feiral da Expo de Sevilla e ao ano seguinte fixo unha longa estancia en Monterrey, México.

Entre 1993 e 1999 trasládase a Vigo e monta o seu estudo en Comesaña. Despois desa estancia en Vigo e até o 2003 vive e traballa en Padrón. En 2003 realizou as súas primeiras exposicións en Alemaña (Hannover e Kommunale Galerie de Berlín). No 2005 fixo unha exposición nas rúas e o exterior do edificio do concello de Ourense.

Reside en Santiago de Compostela e ten o seu estudo no Milladoiro.

Moldeou numerosos bustos por encargos, nos que perfecciona as súas condicións de escultor e participa en certames públicos dos que son resultado as súas cabezas monumentais de Valle-Inclán, Alfredo Suárez Ferrín na Coruña e Pablo Iglesias Posse en Ourense, suficientes para coñecer a súa evolución desde un realismo tradicional ao ciplopeismo que caracterizará a súa obra persoal nunha modelaxe vigorosa.

As súas obras atópanse en coleccións públicas e privadas, e tamén no museo provincial de Lugo, o Carlos Maside da Coruña e o CGAC de Santiago de Compostela.^[2]

• 
  O Fiel contraste (2010, Pontevedra).
• 
  Manuel Antonio (2000, Rianxo).
• 
  Os redeiros, monumento ao traballo (1991, Vigo).
• 
  Busto de Alfredo Suárez Ferrín nos xardíns de Méndez Núñez, na Coruña.
• 
  Reverter, Coleman e o Alpinche (2006, Ourense).
• 
  Caronte no parque escultórico da Torre de Hércules.^[3]
• 
  Xesús Ferro Couselo (1996, Ourense).
• 
  O Columpio (1998, O Burgo)

Wikimedia Commons ten máis contidos multimedia na categoría:  Ramón Conde

• Lista de obras públicas de Ramón Conde

• Castro, X. A.: Arte en Galicia nos 80. Sada, Ediciós do Castro, 1986.
• Calvo Serraller, F.: Enciclopedia del arte español del siglo XX. Madrid, Editorial Mondadori, 1991.
• Castelo Álvarez, Bernardo: La obra pública de Ramón Conde. FINSA. Oviedo. 1999.

• Páxina web do escultor e Obra pública

• Ramón Conde na Colección Afundación.