Lýðveldið Kongó var áður frönsk nýlenda sem hét Franska Kongó og fékk sjálfstæði 1960. Eftir valdarán undir forystu herforingjans Marien Ngouabi árið 1968 var landið gert að Alþýðulýðveldinu Kongó og tekin upp náin stjórnmálatengsl við Sovétríkin og Austurblokkina. Árið 1977 var Ngouabi myrtur og við tók herforingjastjórn sem ríkti yfir landinu til 1992. Fyrsti lýðræðislega kjörni forseti landsins var Pascal Lissouba. Deilur milli hans og forsetaframbjóðandans (og fyrrum forsetans) Denis Sassou Nguesso í aðdraganda forsetakosninga 1997 leiddu til vopnaðra átaka. Sassou náði völdum með aðstoð herliðs frá Angóla. Sassou gerði breytingar á stjórnarskrá landsins sem juku völd forseta og lengdu kjörtímabil hans. Breytingarnar, og þær kosningar sem haldnar hafa verið síðan, hafa verið harkalega gagnrýndar af alþjóðasamtökum.
Stórir hlutar Lýðveldisins Kongó eru regnskógar. Langflestir íbúar Vestur-Kongó búa í suðvesturhluta landsins. Íbúar tala 62 ólík tungumál. Um helmingur þeirra eru rómversk-kaþólskir og um 40% aðhyllast mótmælendatrú. Efnahagslíf Lýðveldisins Kongó byggist aðallega á olíuútflutningi og timbri. Landið á mikið af auðlindum í jörð (fosfat, gull og aðrir málmar) sem eru að miklu leyti ónýttar.
Heiti
Lýðveldið Kongó heitir eftir Kongófljóti sem aftur dregur nafn sitt af Kongóveldinu, ríki sem stóð við ósa fljótsins þegar Portúgalar komu þangað 1483[1] eða 1484.[2] Nafn ríkisins var dregið af heiti íbúa þess, Bakongum, sem er talið merkja „veiðimenn“ (kongóska: mukongo, nkongo).[3]
Þegar landið var frönsk nýlenda hét hún Franska Kongó eða „Mið-Kongó“. Landið var stundum áður nefnt eftir höfuðborg sinni, „Kongó (Brazzaville)“ eða „Kongó-Brazzaville“ til að aðgreina það frá nágrannaríkinu Lýðstjórnarlýðveldinu Kongó. Höfuðborgin Brazzaville dregur nafn sitt af stofnanda nýlendunnar, Pierre Savorgnan de Brazza, ítölskum aðalsmanni sem kenndi sig við bæinn Brazzacco í sveitarfélaginu Moruzzo. Nafnið kemur úr latínu, Brattius eða Braccius sem merkja „handleggur“.[4]
Landfræði
Í Lýðveldinu Kongó er fjölbrett landslag, frá gresjum í flóðskógum Norður-Niari, að Kongófljóti, að fjöllum og frumskógum Mayombe að 170 km langri strönd að Atlantshafi.[5]
Lýðveldið Kongó er í miðvesturhluta Afríku sunnan Sahara, við miðbaug, milli 4. og 5. breiddargráðu norður og 11. og 19. lengdargráðu austur. Lýðstjórnarlýðveldið Kongó liggur sunnan og austan við það, og angólska útlendan Cabinda í suðvestri.
Höfuðborgin, Brazzaville, er við Kongófljótið í suðurhluta landsins, beint á móti Kinsasa, höfuðborg Lýðstjórnarlýðveldisins Kongó.
Í suðvesturhluta landsins er strandslétta þar sem Kouilou-Niari-á rennur út í sjó. Inni í landi er miðháslétta milli tveggja vatnasviða í suðri og norðri. Skóglendi er nýtt af vaxandi krafti.[6] Lýðveldið Kongó fékk meðaleinkunnina 8,89 af 10 og var í 12. sæti á heimsvísu á vísitölunni Forest Landscape Integrity Index árið 2018.[7]
Landið er við miðbaug og veðurfar er því að mestu eins árið um kring. Meðaldagshiti er 24˚C og næturhiti milli 16˚ og 21˚C. Meðalúrkoma er milli 1.100 mm í Niari-dal í suðri að yfir 2.000 mm í miðhlutum landsins. Þurrkatímabilið er frá júní til ágúst. Í stærstum hluta landsins eru tvö úrkomuhámörk, eitt í mars til maí og annað í september til nóvember.[8]
.svg)
